“AZƏRBAYCAN. XXI ƏSRƏ SIÇRAYIŞ”
Moskva, 19 dekabr (AZƏRTAC). Azərbaycanın Rusiyadakı səfirliyində tanınmış Rusiya jurnalisti, 46 il “İzvestiya” qəzetində çalışmış, postsovet məkanında bənzəri olmayan “İzvestiya-Azərbaycan” Rusiya-Azərbaycan medialayihəsinin müəllifi Oleq Sıqanovun Moskvanın Kupriyanov nəşriyyat evində çapdan çıxmış “Azərbaycan. XXI əsrə sıcrayış” kitabının təqdimat mərasimi olmuşdur. Ümummilli lider Heydər Əliyevin ideyası əsasında yaradılmış medialayihə Moskva və Bakı jurnalistlərindən ibarət kollektiv tərəfindən həyata keçirilmişdir.
Layihə Rusiya-Azərbaycan münasibətlərinin gələcəyinə mediasıcrayış idi. Kitabda Azərbaycanın imicinin, onun dünyada və Rusiyada obrazının formalaşmasına kömək edən materiallar toplanmışdır.
Ölkəmizin Rusiyadakı səfiri Polad Bülbüloğlu tədbiri açaraq bildirmişdir ki, SSRİ-nin süqutu dövründə və müstəqilliyinin ilk illərində Azərbaycan güclü informasiya blokadası ilə üzləşmişdi. Bu, ölkədə baş verənlər haqqında obyektiv informasiyanı dünya auditoriyasına çatdırmağa imkan vermirdi. Ümummilli lider Heydər Əliyevin hakimiyyətə qayıdışı ilə Azərbaycanın həyatında yeni mərhələ başlandı. Ulu öndər Heydər Əliyevin mütərəqqi ideyaları və gərgin fəaliyyəti sayəsində informasiya blokadasının yarılması, Azərbaycan həqiqətlərinin dünya ictimaiyyətinə çatdırılması istiqamətində çox işlər görülmüşdür. “İzvestiya-Azərbaycan” medialayihəsi gələcəyə yönəlmiş belə mütərəqqi ideyalardan biri olmuş, mötəbər qəzet vasitəsilə ölkəmizin obyektiv obrazını yaratmağa imkan vermişdir.
Kitabın müəllifi Oleq Sıqanov “İzvestiya-Azərbaycan” medialayihəsinin yaradılması təşəbbüsündən və tarixindən, mətbuat nümayəndələrinin fəal dəstəyi sayəsində informasiya blokadasının yarılmasına və təkcə Rusiya deyil, həm də dünya KİV-lərində Azərbaycanın müsbət obrazının formalaşdırılmasına böyük töhfələr vermiş Azərbaycan xalqının ümummilli lideri Heydər Əliyevin uzaqgörən siyasətindən söhbət açmışdır. O, layihənin həyata keçirilməsini dəstəkləyən ümummilli lider Heydər Əliyev və Prezident İlham Əliyev ilə görüşlərini xatırlamışdır. Azərbaycanı ürəkdən sevən O.Sıqanov demişdir: “Düşünürəm ki, biz düzgün və lazımlı iş görürük”.
Milli Məclisin deputatı, Azərbaycanın əməkdar jurnalisti, yazıçı-publisist Elmira Axundova bildirmişdir ki, bu, həqiqətən, nadir kitabda böyük jurnalist kollektivinin zəngin təcrübəsindən danışılır. O, dahi Heydər Əliyevin KİV-lərə, jurnalistlərə böyük diqqət və qayğısından, onların əməyini qiymətləndirməsindən, informasiya blokadasının yarılması və ölkəmizin müsbət imicinin formalaşdırılması üçün zəruri olan medialayihələri dəstəkləməsindən danışmışdır. E.Axundova demişdir: “Heydər Əliyevsiz bu layihə mümkün olmazdı, bu, ulu öndərin adı ilə bağlıdır”. Layihə həm də O.Sıqanovun, jurnalist kollektivinin vətəndaşlıq rəşadətidir, Azərbaycan-Rusiya əlaqələrinin inkişafı baxımından çox dəyərlidir. E.Axundova O.Sıqanovun peşəkarlığını, öz işinə bağlılığını yüksək qiymətləndirmişdir. Onun sözlərınə görə, sovet dövrünün jurnalistlərini yüksək məsuliyyət hissi fərqləndirirdi. Təəssüf ki, çağdaş dövrün gənc jurnalistlərinin hamısında bu hiss yoxdur. “İzvestiya” ziyalılığa xas olan yeganə ümummilli qəzetdir, oxucular da onun materiallarına böyük maraq göstərirlər. “İzvestiya”nın Azərbaycan-Rusiya münasibətləri, Azərbaycanın imici üçün etdiklərini qiymətləndirmək çətindir. Bu qəzet Rusiya KİV-lərində Azərbaycan mövzusunu formalaşdırmışdır. “İzvestiya” Rusiya KİV-lərində Azərbaycanın simasının dəyişməsi üçün çox işlər görmüşdür.
Postsovet Məkanının Tədqiqi Mərkəzi baş direktorunun müavini, kitabın redaktoru və tərtibçisi Aleksandr Karavayev Azərbaycanın dünyada siyasi reklamında Heydər Əliyev ideyalarının və fəaliyyətinin əhəmiyyətindən danışmışdır. A.Karavayev demişdir ki, bu reklam ölkənin həyatının bütün sahələrində sürətli müsbət dəyişikliklərə əsaslanırdı. O, ümidvar olduğunu bildirmişdir ki, bu medialayihə digər ölkələrdə də belə layihələrin həyata keçirilməsi üçün yaxşı nümunə olacaqdır. Onun sözlərinə görə, buna ehtiyac vardır.
Rusiya Xalqlar Dostluğu Universitetinin Rusiyanın Tədqiqi Mərkəzinin direktoru, fəlsəfə elmləri doktoru İqor Çubays bildirmişdir ki, dahi Heydər Əliyevin düzgün xarici siyasət kursu sayəsində bu gün müasir və sürətlə inkişaf edən Azərbaycan böyük geosiyasi məkanda öz dəqiq yerini tapmışdır. Bu layihə çox səmərəlidir, onun sayəsində biz Azərbaycanı tanımışıq. Öyrənmişik ki, bu ölkə dünyada öz yerini tuta, mürəkkəb geosiyasi şəraitlərdə düzgün çoxşaxəli siyasət yeridə bilmişdir. Azərbaycanın tarazlaşdırılmış siyasəti sayəsində Rusiya ilə möhkəm əlaqələr yaradılmışdır. Azərbaycan öz yolu ilə gedərək regionun digər ölkələri ilə də səmərəli münasibətlər qurmuşdur. Azərbaycan öz yolu ilə gedərək bunu regionun digər ölkələrindən daha məhsuldar etmişdir. Biz hamımız “İzvestiya-Azərbaycan” layihəsi prizmasından Azərbaycan hakimiyyətinin fəaliyyətini maraqla izləyir və bu ölkəyə çox xoş münasibət bəsləyirik.
Tədbirdə Miniatür kitab muzeyinin təsisçisi Zərifə Salahova, tarixçi professor Rudolf İvanov və başqaları çıxış edərək layihənin və kitabın müxtəlif cəhətlərindən söhbət açmışlar. Zərifə Salahova Oleq Sıqanova Prezident İlham Əliyev haqqında “İzvestiya” qəzetinin analitik materialları əsasında tərtib edilmiş miniatür kitab hədiyyə etmişdir.
Təqdimat mərasimində Rusiya və Azərbaycanın ictimai-siyasi, elmi-mədəni və yaradıcı dairələrinin, Rusiya paytaxtındakı Azərbaycan icmasının nümayəndələri iştirak etmişlər.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
