Sentyabrın 15-də - Bilik günündə Bakı məktəbliləri yay tətilindən sonra əllərində gül-çiçək sevimli təhsil ocaqlarına yollanmışlar. Şəhərin minlərlə balaca sakini isə bu il ilk dəfə məktəbə qədəm qoymuşdur.

AZƏRTAC xəbər verir ki, Bilik günü münasibətilə bütün təhsil müəssisələrində təntənəli mərasimlər keçirilmişdir.

Səbail rayonunun Badamdar qəsəbəsindəki 236 nömrəli orta məktəbdə 2008-2009-cu tədris ilində 2100 şagird təhsil alacaqdır. Təhsil ocağının həyətində 640 şagird yerlik yeni tədris korpusu tikilmiş, müasir avadanlıqla təmin olunmuşdur. Məktəbdə yeni kompyuter sinfi fəaliyyətə başlamışdır.

Kollektivin qazandığı uğurlardan danışan 236 nömrəli orta məktəbin direktoru Xanlar İmaməliyev qeyd etmişdir ki, 2007-2008-ci tədris ilində məktəbi bitirmiş məzunların 73-ü ali məktəblərə qəbul olunmuş, onlardan 7-si 600-dən çox bal toplamışdır. Keçən tədris ilində məktəbin 3 şagirdi respublika, 4-ü isə Bakı şəhər fənn olimpiadalarında uğur qazanmış, rayon icra hakimiyyəti tərəfindən aylıq təqaüdlərə layiq görülmüşlər.

Rayonun tanınmış təhsil ocaqlarından olan 190 nömrəli məktəb bu il özünün 63-cü dərs ilinə başlayır. Bilik gününə həsr olunmuş tədbiri açan 190 nömrəli məktəbin direktoru, əməkdar müəllim Afət Bakıxanova yeni tədris ilində məktəbin birinci sinfinə 110 şagird qəbul olunduğunu bildirmişdir. A.Bakıxanova vurğulamışdır ki, keçən tədris ilinin yekunlarına görə, məktəbin kollektivi böyük uğurlar qazanmışdır. Bunun nəticəsidir ki, 72 məzun ali məktəblərə qəbul olunmuş, onlardan 9-u 600-dən, 5-i isə 650-dən çox bal toplamışdır. Bu il Moskvada 36 ölkənin nümayəndələrinin qatıldıqları “Beynəlxalq Rus dili Olimpiadası”nda iştirak edən Azərbaycan nümayəndələri arasında olan 190 nömrəli məktəbin şagirdləri 1-ci və 2-ci yerləri tutmuşlar.

Nərimanov rayonunda şəhid Dilqəm Nəbiyev adına 178 nömrəli orta məktəbin şagirdlərini dərs ilinin başlanması münasibətilə təbrik edən Yeni Azərbaycan Partiyası sədrinin müavini-icra katibi, Milli Məclisin deputatı Əli Əhmədov həyata keçirilən təhsil proqramından, yeni məktəb binalarının tikintisindən və əsaslı təmir işlərindən danışmışdır. 1432 şagirdin təhsil aldığı 178 nömrəli məktəbdə bu il 15 sinif otağından ibarət 3 mərtəbəli tədris korpusu tikilmişdir. Bununla da məktəbdə 48 sinif otağı şagirdlərin ixtiyarına verilmişdir. Bu dərs ilində 135 şagird birinci sinfə qədəm qoymuşdur.

304 nömrəli məktəb-liseyin yerləşdiyi binanın 105 illik tarixi vardır və artıq 85 ildir təhsil ocağı kimi fəaliyyət göstərir. Məktəb binası bu il yenidən qurulmuşdur. 560 şagirdin oxuduğu təhsil ocağında bu il 40 şagird birinci sinfə qədəm qoymuşdur.

Yeni dərs ili Sabunçu rayon ictimaiyyəti, müəllimləri və məktəbliləri üçün də əlamətdar olmuşdur. Rayonun Bakıxanov qəsəbəsindəki 271 nömrəli məktəbdə 720 şagird yerlik əlavə korpus tikilmiş, 74, 94, 187, 71, 68 nömrəli məktəblər əsaslı təmir olunmuşdur.

271 nömrəli məktəbdə keçirilən mərasimdə çıxış edən rayon İcra hakimiyyətinin rəhbərliyi, müəllimlər və qonaqlar bildirmişlər ki, Heydər Əliyev Fondunun təşəbbüsü ilə məktəblərin maddi-texniki bazası gücləndirilmişdir. Yeni tədris ilində rayonun Sabunçu, Kürdəxanı qəsəbələrində məktəblər üçün əlavə korpuslar tikilib istifadəyə verilmişdir. Birinci sinfə qədəm qoyanlar üçün bu il daha əlamətdar olmuşdur. Onlar dərslərini yeni istifadəyə verilən korpusda keçəcəklər.

Suraxanı rayonundakı 226 nömrəli məktəbin şagirdləri də yeni dərs ilinə əsaslı təmir olunan binada başlamışlar. Bilik gününə həsr olunan mərasimdə şagirdləri Milli Məclisin deputatları və məktəbin müəllim kollektivi təbrik etmişdir. Vurğulanmışdır ki, bu il məktəbin 72 məzunu qəbul imtahanlarında ən yüksək nəticə göstərmişdir. Rayon ərazisində qəza vəziyyətində olan məktəblər üçün yeni binalar tikilmiş, köhnə təhsil ocaqları əsaslı təmir olunmuşdur. Müxtəlif proqramlar üzrə 4 yeni məktəb binası tikilmişdir. 97, 280 nömrəli məktəblərdə əlavə korpuslar inşa olunmuşdur. 226, 228 və 278 nömrəli məktəblərdə isə əsaslı təmir işləri aparılmışdır.

Nizami rayonundakı 62 nömrəli məktəb-liseydə yeni dərs ilinin başlanması ilə əlaqədar şagirdlərlə görüş keçirilmişdir. Görüşdə Heydər Əliyev Fondunun bu sahədəki xidmətləri xüsusi vurğulanmışdır. Nizami Rayon İcra Hakimiyyətinin başçısı Mehbalı Əliyev bildirmişdir ki, müəllim və şagirdlərin müasir tələblərə cavab verən yeni məktəblərlə təmin olunması dövlətin təhsilə verdiyi önəmin bariz nümunəsidir.

Bilik günü münasibətilə Nəsimi rayonunun 151, 8 və 28 nömrəli məktəblərində təntənəli tədbir keçirilmişdir. Tədbirdə Milli Məclisin deputatları, rayon icra hakimiyyətinin başçısı Nəsib Məhəməliyev çıxış edərək birinciləri təbrik etmişlər. Bildirilmişdir ki, Nəsimi rayonunun bütün təhsil ocaqları əsaslı təmir olunmuş, tədris ocaqları yeni avadanlıq və texniki vəsaitlərlə təchiz edilmişdir. Tədbirin sonunda birinci sinif şagirdlərinə Heydər Əliyev Fondunun hədiyyələri təqdim olunmuşdur.

15 sentyabr - Bilik günü Xətai rayonunun 171, 98, 204 və 261 nömrəli orta məktəblərində bir sıra tədbirlərlə yadda qalmışdır. 116 nömrəli orta məktəbdə yeni korpusun açılışı olmuşdur. Tədbirlərdə iştirak edən rayon icra hakimiyyətinin başçısı Razim Məmmədov şagird və müəllimləri təbrik edərək bildirmişdir ki, rayonun əsaslı təmirdən çıxan bütün təhsil müəssisələri yeni tədris ilinə tam hazırdır.

Bundan əlavə, yeni tədris ilinin ilk dərs saatlarına baxış keçirilmişdir. Qeyd olunmuşdur ki, rayonun yüksək balla ali məktəblərə daxil olan məzunları şagirdlərə nümunə olmalıdır.

Qaradağ rayonunun Lökbatan qəsəbəsindəki 166 nömrəli məktəb-liseydə 18 sinif otağından ibarət 360 şagird yerlik əlavə korpus istifadəyə verilmişdir. Mərasimdə rayon İcra hakimiyyətinin başçısı Hüseyn İsrafilov, Milli Məclisin deputatları təhsilə dövlət qayğısını xüsusilə vurğulamışlar. Əlavə tədris korpusu ən müasir avadanlıqla təmin olunmuş, müxtəlif fənlər üzrə laboratoriyalar yaradılmışdır.

Müşfiqabad qəsəbəsindəki 274 nömrəli məktəb də əsaslı təmir olunmuşdur. 3 mərtəbəli 1140 şagird yerlik məktəb kompyuter avadanlığı, əyani vəsait və digər ləvazimatlarla təmin edilmişdir.

Səngəçal qəsəbəsindəki 222 nömrəli məktəbin də əsaslı təmirdən sonra açılışı olmuşdur. 1957-ci ildə inşa olunan təhsil ocağında təmir işləri ilk dəfə aparılmışdır. Məktəbdə müasir qazanxana, istilik sistemi quraşdırılmışdır. İkimərtəbəli 29 sinifdən ibarət bu təhsil ocağı ən müasir avadanlıqla təchiz edilmişdir.