Azərbaycanın inkişaf modeli: Sabitlik, dayanıqlı iqtisadiyyat və gələcəyə baxış ŞƏRH
Bakı, 1 iyul, AZƏRTAC
Müstəqilliyinin 35 illiyini qeyd edən ölkəmiz bu dövr ərzində siyasi sabitlik, iqtisadi inkişaf və beynəlxalq əməkdaşlıq prinsipləri üzərində qurulan inkişaf modeli formalaşdırıb. Xüsusilə son onilliklər ərzində həyata keçirilən məqsədyönlü dövlət siyasəti ölkənin regionun aparıcı iqtisadi və nəqliyyat mərkəzlərindən birinə çevrilməsinə, enerji təhlükəsizliyində mühüm rol oynamasına və postmünaqişə dövründə genişmiqyaslı bərpa prosesini həyata keçirməsinə imkan yaradıb.
Bu fikirləri AZƏRTAC-a açıqlamasında “Vətəndaşların Sosial Rifahı Naminə” İctimai Birliyinin sədr müavini Nədimə Rəhimli deyib.
O bildirib ki, dünyada geosiyasi gərginliyin, iqtisadi qeyri-müəyyənliyin və regional münaqişələrin artdığı bir dövrdə Azərbaycanın əsas üstünlüklərindən biri daxili sabitliyi qoruyaraq inkişafını davam etdirməsidir. Müstəqillik illərinin böyük hissəsində ölkədə siyasi, iqtisadi və sosial sabitliyin təmin olunması uzunmüddətli inkişaf strategiyasının həyata keçirilməsi üçün möhkəm zəmin formalaşdırıb. Sabit idarəetmə mühiti iri infrastruktur layihələrinin reallaşdırılmasına, investor etimadının möhkəmlənməsinə, sosial rifah proqramlarının genişləndirilməsinə şərait yaradıb. Məhz bu amillər Azərbaycanın beynəlxalq iqtisadi tərəfdaş kimi etibarlılığını artıran əsas amillər sırasında yer alır.
“Azərbaycan iqtisadiyyatının son illərdə qazandığı uğurlar iqtisadiyyatın şaxələndirilməsi siyasətinin nəticəsi kimi qiymətləndirilə bilər. Hazırda qeyri-neft sektoru ümumdaxili məhsulun 70 faizindən çoxunu formalaşdırır ki, bu da ölkənin yalnız enerji resurslarından asılı olmayan iqtisadi model qurduğunu göstərir. Habelə, sosial sahədə də mühüm nəticələr əldə olunub. Yoxsulluq və işsizlik səviyyəsinin təxminən 5 faiz ətrafında saxlanılması əhalinin sosial müdafiəsinin gücləndirilməsi və məşğulluq siyasətinin səmərəli həyata keçirilməsi ilə əlaqədardır.
Bundan başqa, xüsusilə qeyd etmək lazımdır ki, Azərbaycan Avrasiyanın enerji və nəqliyyat xəritəsində mühüm mövqeyə malikdir. Şərq-Qərb və Şimal-Cənub beynəlxalq nəqliyyat dəhlizlərinin əsas iştirakçılarından biri kimi Azərbaycan qlobal logistika sistemində strateji mövqeyini möhkəmləndirir. Coğrafi üstünlüklərin müasir infrastrukturla birləşdirilməsi ölkəni beynəlxalq yükdaşımaların əsas tranzit mərkəzlərindən birinə çevirib”, - deyə sədr müavini əlavə edib.
Azərbaycanın ərazi bütövlüyünün tam təmin olunmasının ölkənin inkişaf tarixində yeni mərhələ açdığını deyən N.Rəhimli xatırladıb ki, hazırda əsas prioritetlərdən biri Qarabağ və Şərqi Zəngəzurun sürətli bərpası, müasir şəhərsalma prinsipləri əsasında yenidən qurulması və keçmiş məcburi köçkünlərin doğma torpaqlarına təhlükəsiz qayıdışının təmin edilməsidir. Hazırda 90 minə yaxın insan Qarabağ və Şərqi Zəngəzurda yaşayır və işləyir ki, bu da "Böyük Qayıdış" proqramının uğurla icra olunduğunu göstərir. Azərbaycan bununla yanaşı regionda uzunmüddətli sülhün təmin olunması istiqamətində təşəbbüslərlə çıxış edir və əməkdaşlığa əsaslanan gələcək regional inkişaf modelini təşviq edir.
“Bütün bu nailiyyətlər isə göstərir ki, siyasi sabitlik, strateji planlaşdırma və məqsədyönlü iqtisadi siyasət davamlı inkişafın əsas sütunlarıdır. Qlobal çağırışların artdığı müasir dövrdə Azərbaycanın əsas hədəfi əldə olunan uğurları qorumaqla yanaşı, innovativ, rəqabətqabiliyyətli və dayanıqlı iqtisadi model quraraq regionun inkişafında aparıcı rolunu daha da gücləndirəcəyinə inanırıq”, - deyə o vurğulayıb.
Bölmənin digər xəbərləri
