Azərbaycanın milli bayramı – Respublika Günü dünyanın müxtəlif ölkələrində qeyd olunacaqdır
Bakı, 26 may (AZƏRTAC). Diasporla İş üzrə Dövlət Komitəsindən AZƏRTAC-a bildirmişlər ki, Azərbaycanın milli bayramı - Respublika Günü dünyanın müxtəlif ölkələrində qeyd olunacaqdır.
28 May - Respublika Günü ilə əlaqədar xarici ölkələrdəki Azərbaycan diaspor təşkilatları müxtəlif tədbirlər təşkil edəcəklər.
Müsəlman Şərqində ilk demokratik respublika - Azərbaycan Xalq Cümhuriyyətinin (AXC) yaradılmasının 93-cü ildönümü münasibətilə Ümumrusiya Azərbaycanlılar Konqresi (ÜAK), Heydər Əliyev Fondunun Rusiya nümayəndəliyi, Rusiyanın Azərbaycanlı Gənclər Təşkilatı və Azərbaycanın Rusiyadakı səfirliyinin təşkilatçılığı ilə Moskva, Sankt-Peterburq və digər şəhərlərdə artıq müxtəlif tədbir və konfranslar keçirilir. ÜAK-ın Murmansk regional bölməsinin və Rusiya Azərbaycanlı Gənclər Təşkilatının fəallarının dəstəyi ilə mayın 26-da Murmansk şəhərində Respublika Gününə həsr olunmuş tədbir artıq mayın 26-da keçirilmişdir. “Müasir Azərbaycan” mövzusuna həsr olunmuş konfransda AXC-nin yaranmasının tarixi əhəmiyyəti vurğulanmışdır. Demokratik seçki praktikasının, yaşından, cinsindən və hansı sosial təbəqəyə aid olmasından asılı olmayaraq, AXC-də bütün vətəndaşların seçki hüququna malik olduğu barədə verilən məlumatlar konfrans iştirakçılarının böyük marağına səbəb olmuşdur. Konfrans çərçivəsində həmçinin AXC-nin tarixindən bəhs edən fotostend təşkil olunmuşdur.
Respublika Günü münasibətilə mayın 28-də Moskvadakı “Bakı” kino-konsert kompleksində tanınmış müğənni Emin Ağalarovun xeyriyyə konserti olacaqdır. Konsert ÜAK-ın Moskva regional bölməsi ilə birgə təşkil olunacaqdır.
28 May - Respublika Günü ilə əlaqədar Gürcüstan, Ukrayna, Belarus, Moldova, Qazaxıstan, Qırğızıstan və Özbəkistanda da tədbirlər keçiriləcəkdir.
Latviyada fəaliyyət göstərən “Ocaq” Latviya-Azərbaycan Mədəniyyət Mərkəzinin, Estoniyada isə “Aydan” Eston-Azərbaycan Mərkəzinin Azərbaycanın bu ölkələrdəki səfirlikləri ilə birgə mayın 27-də keçirəcəyi tədbirlərdə AXC-nin mövcud olduğu 23 ay ərzində əldə olunmuş nailiyyətlərindən bəhs olunacaqdır.
Mayın 28-də Respublika Günü münasibətilə Şərqi Avropanın bir sıra ölkələrində, o cümlədən Rumıniya, Macarıstan, Çexiyada Azərbaycan diasporunun və bu ölkələrdəki səfirliklərimizin birgə təşkilatçılığı ilə təşkil olunacaq konfrans və dəyirmi masalarda AXC-nin reallıqlarından, süquta uğramasına baxmayaraq şanlı tarix yazmasından bəhs olunacaqdır.
Milli Bayram Qərbi Avropa ölkələrində də geniş qeyd olunacaqdır. Almaniyanın Berlin, Maqdeburq və Drezden şəhərlərində də tədbirlər keçiriləcəkdir. Maqdeburqda Alman-Azərbaycan Mədəniyyət Cəmiyyətinin təşkilatçılığı və Azərbaycanın Almaniyadakı səfirliyinin, Diasporla İş üzrə Dövlət Komitəsinin, Almaniyadakı Azərbaycanlıların Koordinasiya Mərkəzinin dəstəyi ilə reallaşdırılacaq tədbirə Sashsen-Anhalt vilayətində fəaliyyət göstərən 34 müxtəlif ölkənin cəmiyyətləri dəvət olunmuşlar. Almaniyanın Sashsen-Anhalt Gəmisində keçiriləcək tədbirdə bu vilayət üzrə Xaricilər İttifaqının prezidenti Krzysztof Blau, Mixael Marguardt, Dr.Marina Langner, Dr Rulf Kunş və başqalarının iştirakı planlaşdırılmışdır.
İsveçrənin Bazel şəhərində “Azərbaycanın dostları” Birliyinin təşkilatçılığı ilə mayın 29-da təşkil ediləcək mərasimdə Azərbaycan diasporu ilə yanaşı digər millətlərin nümayəndələrinin də iştirakı planlaşdırılmışdır.
Mayın 28-də Finlandiyanın paytaxtı Helsinkidə bu ölkədə yaşayan azərbaycanlıları birləşdirən “Dostluq” Cəmiyyəti 28 May - Respublika Gününə həsr olunmuş “Anam doğma Vətənim - Azərbaycan” adlı mədəni-kütləvi tədbir keçirməyi planlaşdırmışdır. Tədbirdə Azərbaycan və Türkiyə diasporlarının, Finlandiya ictimaiyyətinin, bu ölkədə yaşayan digər milli azlıqların nümayəndələrinin da iştirakı nəzərdə tutulmuşdur. Tədbirə toplaşanlara müstəqil Azərbaycanın keçdiyi yol, respublikadakı iqtisadi inkişaf, Ermənistan-Azərbaycan, Dağlıq Qarabağ münaqişəsi nəticəsində torpaqlarımızın 20 faizinin işğalı və 1 milyondan artıq azərbaycanlının qaçqın və məcburi köçkün düşdüyü barədə məlumat veriləcəkdir.
AXC-nin yaranmasının 93-cü ildönümü münasibətilə Türkiyə və Şimali Kiprdə də tədbirlərin keçirilməsi planlaşdırılmışdır.
Türkiyə Azərbaycan Dərnəkləri Federasiyası (TADF) tərəfindən “dəyirmi masa”lar, mətbuat konfransları, ziyafət və musiqili tədbirlər keçiriləcəkdir. Türkiyə Azərbaycan Dərnəyinin təşkilatçılığı ilə daha bir tədbirin İğdır şəhərində keçirilməsi planlaşdırılmışdır.
“Kanada-Azərbaycan Əməkdaşlıq Assosiasiyası” Kvebek Azərbaycanlıları Assosiasiyası və “Alberta Azərbaycan Mədəniyyət Mərkəzi”nin təşəbbüsü ilə Kanadanın Toronto, Monreal və Edmonton şəhərlərində, “Azərbaycan Amerika Cəmiyyəti”, “Azərbaycan-Nyu-York Assosiasiyası”, “Amerika-Azərbaycan Şurası”, “Hyuston-Bakı Qardaşlaşmış Şəhərlər Assosiasiyası”nın təşkilatçılığı ilə ABŞ-ın Nyu-York, Los-Anceles və Hyuston şəhərlərində də Azərbaycanın milli bayramı - Respublika Gününə həsr olunmuş tədbirlər keçiriləcəkdir.
Yeni Zelandiyada yaşayan azərbaycanlılar və bu ölkədə təhsil alan azərbaycanlı gənclər də Respublika Gününü təntənə ilə qeyd edəcəklər.
Azərbaycan diasporunun nümayəndələri mayın 27-dən 29-dək Yeni Zelandiyanın paytaxtı Vellinqtonda keçiriləcək sərgidə “Azərbaycan məhsulları” şüarı ilə iştirak edəcək, Azərbaycanın məhsulları ilə bərabər Azərbaycan Respublikası haqqında sərgi iştirakçılarına və qonaqlara məlumat verəcəklər.
Bölmənin digər xəbərləri
