Azərbaycanın Qarsdakı konsulluğu 20 Yanvar faciəsinin 21-ci ildönümü ilə əlaqədar tədbir keçirmişdir
Bakı, 19 yanvar (AZƏRTAC). Azərbaycanın Qarsdakı konsulluğu 20 Yanvar faciəsinin 21-ci ildönümü ilə əlaqədar anma mərasimi keçirmişdir.
AZƏRTAC xəbər verir ki, tədbir iştirakçıları əvvəlcə Azərbaycan xalqının ümummilli lideri Heydər Əliyevin abidəsi önünə əklil qoymuş və gül dəstələri düzmüşlər.
Böyük Qala Otelinin Qazi Qars salonunda davam etdirilən tədbirdə şəhidlərin xatirəsi bir dəqiqəlik sükutla yad edilmişdir.
Baş konsul Ayxan Süleymanov, Qars bələdiyyəsinin sədri Nevzat Bozkuş, TBMM -in qarslı millət vəkili Zəki Karabayır və başqaları faciə ilə bağlı çıxış etmişlər.
A. Süleymanov bildirmişdir ki, Azərbaycan xalqının tarixinə həm faciə, həm də qəhrəmanlıq nümunəsi kimi yazılmış 20 Yanvar hadisələrindən 21 il keçir. Qədirbilən xalqımız şəhidlərini unutmur, hər il Şəhidlər xiyabanını ziyarət edir. Xarici ölkələrdəki səfirliklərimiz, konsulluq və nümayəndəliklərimiz, eləcə də diaspor təşkilatlarımız da şəhidlərimizin xatirəsini daim əziz tutur, müxtəlif tədbirlər keçirir, dünya ictimaiyyətini məlumatlandırırlar.
Sonda 20 Yanvar faciəsindən bəhs edən videoçarx nümayiş etdirilmişdir.
Bölmənin digər xəbərləri
