Azərbaycanın təşəbbüsləri Türk dünyasında ortaq əməkdaşlıq platformasını gücləndirir - ŞƏRH
Bakı, 20 may, AZƏRTAC
Türk dünyası hazırda yeni və daha dinamik geosiyasi mərhələyə qədəm qoyur. Son illərdə baş verən proseslər açıq şəkildə göstərir ki, Türk dövlətləri arasında əməkdaşlıq artıq yalnız diplomatik və iqtisadi sahələrlə məhdudlaşmır, eyni zamanda hərbi, siyasi, ictimai, mədəni və institusional müstəvidə də sürətlə dərinləşir. Bu yaxınlaşmanın əsas dayaqlarını isə ortaq tarixi yaddaş, ümumi təhlükəsizlik maraqları, milli-mənəvi dəyərlər və regional inteqrasiyanın gücləndirilməsi təşkil edir.
Bu fikirləri AZƏRTAC-a açıqlamasında “Orta Asiya və Güney Qafqaz Söz Azadlığı Şəbəkəsi” (CASCFEN) İctimai Birliyinin sədri, siyasi şərhçi Nadir Azəri səsləndirib.
O bildirib ki, Türk dünyasının gələcək strateji hədəfləri artıq ən yüksək siyasi səviyyədə açıq şəkildə ifadə olunur: “Prezident İlham Əliyevin Qazaxıstanın Türküstan şəhərində keçirilən Türk Dövlətləri Təşkilatının Dövlət başçılarının qeyri-rəsmi Zirvə görüşündə səsləndirdiyi fikirlər də bunu bir daha təsdiqləyir. Dövlət başçısı bəyan edib ki, ailəmiz olan Türk dünyası XXI əsrin nüfuzlu geosiyasi güc mərkəzlərindən birinə çevrilməlidir və Azərbaycan bundan sonra da Türk Dövlətləri Təşkilatının möhkəmləndirilməsi naminə səylərini əsirgəməyəcək. Bu yanaşma Türk dünyasında inteqrasiyanın artıq strateji prioritetə çevrildiyini göstərir”.
Nadir Azəri qeyd edib ki, Türk dövlətləri liderlərinin nümayiş etdirdiyi siyasi iradə Türk Dövlətləri Təşkilatının artıq regional platformadan qlobal aktora çevrilməsi istiqamətində mühüm mərhələnin əsasını formalaşdırır: “Lakin təbii ki, bu prosesin davamlı və effektiv olması üçün əməkdaşlıq yalnız dövlətlərarası münasibətlərlə məhdudlaşmamalıdır. İctimai dəstək, vətəndaş cəmiyyətinin iştirakı və institusional mexanizmlərin inkişafı da xüsusi əhəmiyyət daşıyır. Çünki hər hansı siyasi strategiyanın uzunömürlü və təsirli olması üçün onun cəmiyyət tərəfindən qəbul edilməsi və dəstəklənməsi vacibdir. Bu baxımdan qeyri-hökumət təşkilatlarının rolu xüsusilə ön plana çıxır. Sevindirici haldır ki, bu istiqamətdə də Azərbaycanın təşəbbüskarlığı açıq şəkildə müşahidə olunur. Ötən il Azərbaycanın təşəbbüsü ilə Türk Dövlətləri Təşkilatına üzv ölkələrin Qeyri-Hökumət Təşkilatlarının I Həmrəylik Forumu keçirildi və həmin forum çərçivəsində Türk Dövlətləri Təşkilatına üzv ölkələrin QHT Platforması yaradıldı. 2026-cı il mayın 16-da Azərbaycanın QHT Agentliyinin təşkilatçılığı, Türk Dövlətləri Təşkilatına üzv ölkələrin QHT-lərinin Platformasının tərəfdaşlığı ilə keçirilən İkinci Həmrəylik Forumu isə artıq bu əməkdaşlığın daha geniş miqyas aldığını və praktik mərhələyə keçdiyini nümayiş etdirdi”.
CASCFEN sədri vurğulayıb ki, forum çərçivəsində müxtəlif istiqamətlər üzrə əməkdaşlıq imkanları geniş şəkildə müzakirə olunub: “Xüsusilə Azərbaycan–Türkmənistan, Azərbaycan–Qırğızıstan və Azərbaycan–Şimali Kipr QHT-lərinin I Əməkdaşlıq Forumlarının keçirilməsi Türk dünyasında ictimai diplomatiyanın yeni mərhələyə qədəm qoyduğunu göstərir. Bununla yanaşı, forum çərçivəsində gənclərlə bağlı xüsusi panelin təşkil olunması da böyük əhəmiyyət daşıyır. Çünki ortaq tariximizin, mədəniyyətimizin, qəhrəmanlıq irsimizin, dil və əlifba birliyimizin gələcək nəsillərə ötürülməsi prosesində əsas missiya məhz gənclərin və vətəndaş cəmiyyətinin üzərinə düşür”.
Nadir Azəri hesab edir ki, Azərbaycanın təşəbbüsü ilə atılan addımlar artıq konkret nəticələr verməyə başlayıb: “Bu gün Türk Dövlətləri Təşkilatına üzv ölkələrin QHT Platforması Türk dünyası vətəndaş cəmiyyətinin daha sıx inteqrasiyası üçün mühüm baza rolunu oynayır. Eyni zamanda bu platforma gələcək mərhələdə daha sistemli əməkdaşlıq mexanizmlərinin, ortaq layihələrin və uzunmüddətli strateji proqramların hazırlanması üçün geniş imkanlar yaradır. Hesab edirəm ki, növbəti mərhələdə bu Platforma Türk dünyası liderlərinin ortaya qoyduğu siyasi iradəyə uyğun şəkildə daha geniş fəaliyyət proqramları, strateji sənədlər və ortaq fəaliyyət mexanizmləri hazırlamalıdır. Məhz bu yanaşma Türk dünyası QHT-lərinin daha sıx inteqrasiyasını təmin etməklə yanaşı, ortaq milli-mənəvi mirasın qorunması, gələcək nəsillərə ötürülməsi və davamlı əməkdaşlığın daha da gücləndirilməsi baxımından mühüm rol oynayacaq”.
Bölmənin digər xəbərləri
