Azərbaycanlıların Əlaqələndirmə Mərkəzi Berlin Senatının siyahısına qəbul edilmişdir
Bakı, 8 sentyabr (AZƏRTAC). Berlin Senatının 2010-cu ilin dekabrında qəbul etdiyi “Əlaqə və inteqrasiya haqqında Qanun”a əsasən Almaniyadakı Azərbaycanlıların Əlaqələndirmə Mərkəzi (AAƏM) diaspor təşkilatı kimi Berlin torpağının Məsləhətçi Şurasının ictimai siyahısına qəbul edilmişdir.
Diasporla İş üzrə Dövlət Komitəsindən AZƏRTAC-a bildirmişlər ki, bununla da AAƏM Almaniyada mühacirətdə yaşayan əcnəbilərin təmsilçisi kimi Məsləhətçi Şuranın seçkilərində iştirak etmək hüququ qazanmışdır.
Məsləhətçi Şuranın yığıncaqlarında Berlin Senatında inteqrasiya və miqrasiya siyasətini təkmilləşdirmək üçün məsləhət, informasiya və təkliflər irəli sürülür. Almaniyada mühacirətdə yaşayan əcnəbi vətəndaşlar seçki hüququna malik olmadıqlarına və Berlinin siyasi həyatına təsir göstərə bilmədiklərinə görə Məsləhətçi Şuraya üzv olmaqla siyasi proseslərin gedişində əhəmiyyətli rol qazanırlar.
AAƏM bu ilin iyulunda Berlində fəaliyyət göstərən Azərbaycan cəmiyyətlərinə bu barədə məlumat vermiş, seçmək və seçilmək hüququ qazana bilmək və Məsləhətçi Şuranın siyahısına düşmək üçün Berlin Senatına müraciət etmələrini məsləhət görmüşdür.
Mərkəz öz müraciətinin müsbət nəticə verdiyini Almaniyadakı Azərbaycanlıların inteqrasiyasında növbəti uğur hesab edir.
Bölmənin digər xəbərləri
