Bakı Slavyan Universitetinin məktəb-lisey kompleksində 20 Yanvar şəhidlərinin xatirəsi anılmışdır
Bakı, 19 yanvar (AZƏRTAC). Yanvarın 19-da Bakı Slavyan Universitetinin (BSU) məktəb-lisey kompleksində 20 Yanvar şəhidlərinin xatirəsi anılmışdır.
AZƏRTAC xəbər verir ki, “Gəncliyin Elmi Mədəni İnkişafı” İctimai Birliyi və BSU-nun birgə təşkilatçılığı ilə keçirilən “Qanlı Yanvar” adlı tədbirdə 21 il bundan əvvəl qaniçən sovet ordusu tərəfindən Bakıda və Azərbaycanın digər bölgələrində törədilmiş qırğınlarla bağlı çıxışlar dinlənilmiş, ədəbi-bədii kompozisiya göstərilmişdir.
Məktəb-liseyin direktoru, professor Telman Cəfərov 20 Yanvar faciəsinin mahiyyəti barədə ətraflı məlumat vermiş, Azərbaycanın müstəqilliyi və azadlığı uğrunda canlarından keçmiş şəhidlərimizin əziz xatirəsinin yaddaşlarda daim yaşayacağını vurğulamışdır.
“Gəncliyin Elmi Mədəni İnkişafı” İctimai Birliyinin sədri Sərdar Yusifoğlu və başqaları öz çıxışlarında faciənin bəşəriyyətə və insanlığa qarşı törədilmiş ən ağır cinayətlərdən biri olduğunu qeyd etmişlər.
Sonda rejissor Röyal Cəbiyevin səhnələşdirdiyi bədii kompozisiya nümayiş etdirilmişdir.
Bölmənin digər xəbərləri
