Bakıda Sabantuy tatar milli bayramı qeyd olunacaq
Bakı, 16 iyun, AZƏRTAC
Bakıda iyunun 18-də Dənizkənarı Bulvarın ərazisində Sabantuy tatar milli bayramı qeyd ediləcək.
AZƏRTAC xəbər verir ki, bu il bayram Azərbaycanın Ümummilli Lideri Heydər Əliyevin anadan olmasının 100 illiyinə həsr olunub.
"Baursak”ın Evi" adlanan sahədə çayxana kimi stilizə edilmiş fotozona təqdim olunacaq. Orada iştirakçılar həmçinin tatar şirniyyatları, çay, keramika və “baursak” adlanan şirniyyatlara qonaq ediləcək. Bundan əlavə, burada taxta samovar şəklində çay stendlərində milli naxışların çəkilməsi üzrə ustad dərsi keçiriləcək.
“Milli müdriklik evi” adlanan sahədə tatar ictimai xadimlərinə və Ümummilli Lider Heydər Əliyevin 100 illik yubileyinə həsr olunmuş “Mənəviyyat, mədəniyyət, maarifçilik” adlı sərgi ekspozisiyası hazırlanacaq.
Mədəni tədbirin proqramında həmçinin xalq sənəti yarmarkası və müxtəlif müsabiqələr nəzərdə tutulub.
Sabantuy iştirakçıları zonalar üzrə idman-əyləncə oyunlarında da iştirak edə biləcəklər.
Bayramın baş səhnəsində Azərbaycan və Tatarıstan artistlərinin iştirakı ilə konsert keçiriləcək.
Tədbirə giriş pulsuzdur.
Bölmənin digər xəbərləri
