Balakənli kümçülər bu il 17,5 tondan çox yaş barama istehsal ediblər
Balakən, 21 iyun, Mustafa Dadaşov, AZƏRTAC
Balakən rayonunda barama tədarükü başa çatıb. Rayonun kümçüləri bu il qəbul məntəqəsinə 17 ton 514 kiloqram yaş barama təhvil veriblər.
Bu barədə AZƏRTAC-ın bölgə müxbirinə Balakən Dövlət Aqrar İnkişaf Mərkəzinin bitkiçilik sektorunun müdiri Şahin Rəhimli məlumat verib.
Bildirilib ki, cari mövsümdə barama yetişdirmək üçün 169 kümçü ilə müqavilə bağlanılıb, onlara 600 qutu və ya 11,4 kiloqram ipəkqurdu paylanılıb.
Qurum rəsmisinin sözlərinə görə, Xalatala kəndindən olan Səadət Ramazanova builki mövsümdə qəbul məntəqəsinə rayon üzrə hamıdan çox – 302,8 kiloqram yaş barama təhvil verib. Kümçü bu il 6 qutu, yəni 114 qram ipəkqurdunun yemlənməsi ilə məşğul olub. Hər qutudan məhsuldarlıq 50,5 kiloqram təşkil edib. Qaysa kəndindən Nişanə Çopsiyeva bu il 265,1 kiloqram, Katex kəndindən Cəlal Nuriyev isə 259,7 kiloqram yaş barama istehsal ediblər. Məntəqədə yaş baramanın qəbulu “Azəripək” ASC-nin tədarük üzrə mütəxəssisinin iştirakı ilə həyata keçirilib.
Qeyd edək ki, ötən il olduğu kimi, bu il də kümçülərə istehsal etdikləri yaş baramanın hər kiloqramına görə 11 manat ödəniləcək.
Bölmənin digər xəbərləri
