Belarusda Dünya Azərbaycanlılarının Həmrəyliyi Günü qeyd edilmişdir
Minsk, 28 dekabr (AZƏRTAC). Azərbaycanın Minskdəki səfirliyi Belarus Dövlət Filarmoniyasının konsert salonunda Dünya Azərbaycanlılarının Həmrəyliyi Günü münasibətilə bayram konserti təşkil etmişdir.
Səfir Əli Nağıyev tədbirin rəsmi hissəsində çıxış edərək demişdir: ”Bu bayramı haqlı olaraq, sadəcə, Həmrəylik Günü deyil, həm də məhəbbət, anlayış, hörmət günü adlandırmaq olar. Bu hissləri keçirmək üçün isə azərbaycanlıların kim olduqlarını yaxşı başa düşmək lazımdır. Onlar necə xalqdır? Hansı misilsiz mədəni dəyərlərə sahibdir? Dünya sivilizasiyasına nə kimi töhfələr verə bilər?
Tarixə ekskurs edən diplomat taleyin hökmü ilə müxtəlif dövlətlərin ərazilərində yaşayan çoxmilyonlu Azərbaycan xalqından söz açmışdır.
Diplomatik nümayəndəliyimizin başçısı öz çıxışını bu sözlərlə yekunlaşdırmışdır: ”Bununla belə, dünyanın hansı guşəsində yaşamağımızdan asılı olmayaraq, Azərbaycan xalqının böyük oğullarının bizdən əvvəl etdikləri kimi, məğrur azərbaycanlı adını ləyaqətlə daşımalıyıq”.
Konsert proqramına Gədəbəy aşıqları Neymət Qasımovun və Altay Məmmədovun könül oxşayan çıxışları daxil idi. Onlar mahir saz çalmaları, gözəl ifaları ilə dinləyiciləri valeh etmişlər.
Konsertdən sonra diplomatik nümayəndəliyimiz Dünya Azərbaycanlılarının Həmrəyliyi Günü münasibətilə təntənəli qəbul təşkil etmişdir.
Zeynal Ağazadə
AZƏRTAC-ın xüsusi müxbiri
Minsk
Bölmənin digər xəbərləri
