Bizim məqsədimiz Azərbaycanı Estoniyada təbliğ etməkdir
Tallinn, 3 sentyabr (AZƏRTAC). Estoniyanın “Radio-4” kanalında efirə çıxan “Azərbaycanın səsi” verilişinin baş redaktoru Sənəm Əliyeva AZƏRTAC-ın müxbiri ilə söhbətinin əvvəlində demişdir: “Bizim məqsədimiz Azərbaycanı Estoniyada təbliğ etməkdir”.
Sənəm Əliyeva Bakıda anadan olmuşdur, 15 ildən çoxdur ki, Estoniyada yaşayır. Tallinndəki uşaq bağçasında tərbiyəçi işləyir. O həm də Azərbaycan bazar günü məktəbinin rəhbəridir, Azərbaycanı, onun tarixini və mədəniyyətini fəal təbliğ edir.
İki il bundan əvvəl Estoniya Mədəniyyət Nazirliyi bu ölkədəki milli azlıqlara müraciətlə dövlət radiosunda özlərinin yarım saatlıq verişini yaratmağı təklif etmişdir. S.Əliyeva deyir: “Biz bu təklifi aldıqdan sonra təbliğat üçün gözəl vasitə olan bu imkandan istifadə etməyi qərara aldıq”.
Keçən ilin oktyabr ayında “Azərbaycanın səsi” verilişinin ilk buraxılışı efirə çıxdı. Bu veriliş özünün hər bir rubrikasında Azərbaycanda baş verən hadisələri, ölkəmizin uğurlarını, elm və mədəniyyət yeniliklərini işıqlandırır, dinləyiciləri Azərbaycanın görkəmli şəxsiyyətləri ilə tanış edir. Sənəm Əliyeva deyir: “Bizim mədəniyyətdən danışanda Azərbaycan musiqisinin beşiyi sayılan Qarabağ haqqında söhbətə toxunmaya bilmərik”. “Azərbaycanın səsi” verilişinin buraxılışları əsasən Dağlıq Qarabağ münaqişəsinə həsr edilir. Bu verilişdə Şuşaya aid rubrikalar da olmuşdur. Fevral ayında efirə çıxmış veriliş Xocalı faciəsi ilə bağlı idi. Müsahibim deyir: “Xocalı haqqında material efirə çıxandan sonra bizə bir məktub gəldi. Müəllifi çox güman ki, erməni diasporunun üzvü olan bu məktubda Sumqayıt hadisələrindən bəhs edilirdi. Biz də ona savadlı tərtib edilmiş, faktlara əsaslanan cavab məktubu göndərdik”.
Sənəm xanım daha sonra deyir: “Biz verilişimizə qulaq asanların çox olub-olmadığını öyrənmək məqsədi ilə ayrıca bir rubrikada dinləyicilərə Azərbaycan haqqında üç sual verdik. Yarım saat ərzində studiyaya təqribən 20 nəfər zəng vurdu. Bu adamların arasından iki qalib seçildi”.
Bu ilin əvvəlindən Estoniyanın müxtəlif gimnaziyalarında Azərbaycan Mədəniyyəti Günləri keçirilmişdir. S.Əliyeva bununla əlaqədar deyir: “Biz yuxarı sinif şagirdlərinə Azərbaycanın tarixi, mədəniyyəti və incəsənəti haqqında eston və rus dillərində məlumat verdik. Məktəblilər Azərbaycan xalqının ənənələri ilə, bizdə İslam dininə və qadına münasibət məsələləri ilə çox maraqlanırdılar”.
Tallinndəki uşaq bağçasında Azərbaycan Mədəniyyəti Günləri çərçivəsində balaca aktyorlar “Cırtdan” nağılını eston dilində nümayiş etdirdilər. Azərbaycan Mədəniyyəti Günlərinin bağlanış mərasimində Azərbaycanın Estoniyadakı səfiri Tofiq Zülfüqarov, Türkiyənin bu ölkədəki səfiri Ayşanur Arpaslan, habelə Estoniya Təhsil və Mədəniyyət nazirliklərinin, vətəndaşlıq və miqrasiya departamentinin nümayəndələri iştirak etmişlər.
Sənəm Əliyeva daha bir maraqlı fakt haqqında məlumat verdi: Yeni dərs ilindən başlayaraq Tallinn Pedaqoji Universitetinin humanitar elmlər fakültəsində türkoloq Tano Tilqar Azərbaycan haqqında Azərbaycan dilində mühazirələr oxuyacaqdır.
Hazırda Estoniyada min nəfərdən artıq həmvətənimiz yaşayır. Onların arasında bütün Estoniyada tanınmış azərbaycanlılar da az deyil: Tartu Universitetində türk dili kafedrasının müdiri Xaqani Qayıblı, karate-do üzrə Avropa çempionu Amid Məhərrəmov. Yeri gəlmişkən, Tallinndə Amidin idman məktəbi fəaliyyət göstərir. Həmyerlimiz bu məktəbdə gələcək çempionlar yetişdirir.
S.Əliyeva deyir: “Eurovision-2011” mahnı müsabiqəsində Azərbaycanın qələbəsindən sonra Estoniyada Azərbaycana maraq xeyli artmışdır. Estoniya nəşriyyatlarından biri Bakıda keçiriləcək “Eurovision-2012” mahnı müsabiqəsinə həsr edilmiş “Mənim Azərbaycanım” adlı kitab nəşr etmək niyyətindədir.
Sənəm Əliyeva sonda demişdir: “Mən tez-tez Azərbaycanda oluram, axı Azərbaycan mənim Vətənimdir, o mənə su kimi, hava kimi lazımdır, mən onsuz yaşaya bilmərəm”.
Nigar Hüseynova
AZƏRTAC-ın xüsusi müxbiri
Tallinn
######
Bölmənin digər xəbərləri
