“Büllur saray” sanatoriyası Azərbaycan vətəndaşlarını istirahətə və müalicəyə dəvət edir
Bakı, 19 fevral (AZƏRTAC). “Büllur saray” Ukraynanın Truskavets kurort şəhərinin ən yaxşı sanatoriyalarından biridir. O, şəhərin mərkəzi hissəsinin gözəl bir guşəsində, köhnə parkın ərazisində yerləşir. Buradan mineral su bulaqlarına iki dəqiqəyə getmək olar. Vaxtilə SSRİ dövründə bu sanatoriya qapalı idi, ölkənin demək olar ki, yalnız birinci şəxsləri buraya gəlirdi. Lakin 2006-cı ildən başlayaraq sanatoriya öz qapılarını burada istirahət etmək və keyfiyyətli tibbi müalicə almaq istəyənlərin hamısının üzünə geniş açmışdır. Truskavets Azərbaycan turistlərinin daha çox üstünlük verdikləri kurort şəhərlərindən biridir.
“Büllur saray” sanatoriyasının Bakıya gəlmiş meneceri İvan Proxna AZƏRTAC-ın müxbiri ilə söhbətində demişdir ki, Truskavetsə gələn bütün turistlərin 15-25 faizini Azərbaycan vətəndaşları təşkil edir. İvan Proxna Bakıya gəlişinin məqsədindən danışarkən bildirmişdir ki, o, tərəfdaşları ilə görüşmək, şəhərin kurortlarında Azərbaycan vətəndaşlarını qəbul etmək üçün yeni kontraktlar bağlamağa və mövcud kontraktları təzələməyə gəlmişdir. Ukrayna Prezidentinin İşlər İdarəsinin sanatoriyalar üzrə təmsilçisi İvan Proxna artıq Azərbaycan Respublikası Prezidentinin İşlər İdarəsində, Həmkarlar İttifaqları Konfederasiyasında, sahə həmkarlar ittifaqlarında görüşlər keçirmiş, ölkəmizin müxtəlif turizm operatorlarının nümayəndələri ilə görüşmüşdür.
İvan Proxnanın sözlərinə görə, o, Azərbaycandakı həmkarlarına Truskavetsin sağlamlıq müəssisələrində Azərbaycan vətəndaşlarının istirahətinin və müalicəsinin təşkili barədə öz təkliflərini vermişdir. Qonaq demişdir: “Ümid edirik ki, onlar təkliflərimizi öyrənəcək və biz vətəndaşlarınızın Ukraynaya istirahət etməyə, müalicə olunmağa gələ bilməsi üçün müqavilələr bağlayacaq, əməkdaşlıq edəcəyik.
“Büllur saray” sanatoriyasında xroniki xolesistit, hepatit, xroniki pankreatit, öd daşı xəstəliyi, xroniki pielonefrit, qastrit, duodenit, kolit, xroniki sistit, prostatit, maddələr mübadiləsinin pozulması, piylənmə, şəkərli diabet xəstəlikləri müalicə olunur. Biz öz turizm bazarımızı genişləndiririk və ümid edirik ki, Azərbaycandan gələn turistlərin də sayını artıracağıq”.
Truskavets şəhəri bütün dünyada öz nadir “Naftusiya” mineral suyu ilə tanınmışdır. Bu mineral su orqanizmdə urodinamika proseslərini yaxşılaşdırır, böyrəklərdən qumun, xırda daşların təmizlənməsinə kömək edir, iltihab əleyhinə təsir göstərir, daş əmələ gəlməsinin qarşısını alır, daxili sekresiya vəzilərinin funksiyasını yüksəldir, orqanizmdən radionuklidləri, şlakları çıxarır, qaraciyərin funksiyasını yaxşılaşdırır. “Naftusiya” mineral suyu həmçinin immun sistemini bərpa edir, o, ödqovucu, ağrıkəsici və dezintoksikasiya təsirinə malikdir. Bu, canlı sudur, onu yalnız büvetdə içmək lazımdır, hava ilə reaksiyaya girdikdə dərhal öz keyfiyyətini itirir. Sanatoriyada yeni vannalar - dəri xəstəliklərinin, osteoxondrozun və digər xəstəliklərin müalicəsi üçün çox faydalı olan hidrogen sulfidli vannalar açılmışdır. Müalicə bazası çox güclüdür, həkimlərin hamısı yüksək dərəcədə peşəkardır.
Azərbaycan turistlərinin Truskavetsə necə getməsi sualına cavabında İvan Proxna demişdir ki, bu şəhərə gəlmək artıq xeyli asanlaşmışdır, bu yaxınlarda Bakı-Lvov-Bakı birbaşa təyyarə reysi açılmışdır. Bu reys hər bazar günü Azərbaycanın “AZAL” aviaşirkəti tərəfindən həyata keçirilir.
Truskavetsdən 45 kilometr aralıqda Morşin adlı kiçik kurort şəhərciyi yerləşir. Buradakı təbii bulaqlar qeyri-adi keyfiyyətlərə malikdir. Artıq bir əsrdən çoxdur ki, ənənələr və nadir təbii faktorları sayəsində Morşinin müalicə ocaqları şəkərli diabetdən, qaraciyər, bağırsaq, mədəaltı vəzi, mədə və digər həzm orqanları xəstəliklərindən əziyyət çəkənlər üçün əsas sağlamlaşdırma müəssisələrinə çevrilmişdir.
Truskavets kurortundan təqribən 20 kilometr aralıqda, Sxidnıçanka çayının gözəl vadisində Sxodnitsa adlı kiçik kurort kəndi vardır. Bu kənd çox gözəl bir məkanda, dağların, sıx iynəyarpaqlı ağac meşəliklərinin əhatəsində yerləşir. Sxodnitsa kurortu çoxprofillidir. Onun suları Truskavetsin “Naftusiyası” ilə eynidir, böyrək, xroniki hepatit, xolesistit, öd daşı xəstəliklərinin müalicəsi üçün faydalıdır.
Müalicədən sonra, kurorta gələnlərin asudə vaxtlarında “Büllur saray” sanatoriyasının müdiriyyəti onlara istirahət günü turları təklif edir: Avropa şəhərlərinə - Praqa, Krakov, Budapeşt, Drezden, Berlin, Vyana, Venetsiya, Roma, Amsterdam və Brüsselə, habelə Slovakiyanın termal bulaqlarla zəngin dağlıq bölgələrinə maraqlı səyahətlər etmək imkanı verir. Viza alınması məsələləri operativ şəkildə elə sanatoriyada həll edilir.
Sanatoriyalarda müalicənin qiymət diapazonu ekonom-klassdan başlamış VIP - xidmət səviyyəsinədək müxtəlifdir. Qiymətə yaşamaq, yemək, tibbi xidmət, müxtəlif prosedurlar, habelə hovuz daxildir. Müalicə kursu minimum 16 gündür. Sanatoriya-kurort kartı olmayanlar onu elə yerindəcə alıb bütün analizləri verdikdən sonra müalicə prosedurlarına başlaya bilərlər.
Bölmənin digər xəbərləri
