Bundesliqa tarixində yeni rekord
Bakı, 20 aprel, AZƏRTAC
Futbol üzrə Almaniya çempionatının 30-cu turu çərçivəsində “Union Berlin” ilə “Ştutqart” arasında keçirilən və 4:4 hesabı ilə başa çatan qarşılaşmada rekord qeydə alınıb.
AZƏRTAC xəbər verir ki, qolların hamısının ilk yarıda qeydə alındığı bu qarşılaşma birinci hissədə ən çox qol vurulan oyun kimi Bundesliqanın, eləcə də Almaniyanın futbol tarixinə düşüb. Bundesliqada sonuncu dəfə bir hissədə ən çox qol 1982-ci ildə “Borussiya Dortmund”un “Arminia Bielefeld”i 11:1 hesabı ilə məğlub etdiyi oyunun ikinci hissəsində vurulub. Həmin görüşdə qolların 10-u ikinci hissədə vurulub. Lakin birinci hissədə 8 qolun qeydə alınması Bundesliqa tarixində ilk dəfə baş verib.
Qeyd edək ki, “Union Berlin” görüşdə Andrey İliç (5) və Dioqo Leitenin (19) qolları ilə hesabda irəli çıxıb. “Ştutqart” 23-cü və 29-cu dəqiqələrdə Deniz Undav və Enzo Millotun uzaq məsafədən vurduqları qollarla hesabı bərabərləşdirib. Görüşün 38-ci dəqiqəsində Leopold Querfeld 35 metr məsafədən baxımlı zərbə ilə “Union”u yenidən hesabda irəli çıxarıb. Qonaqlar Jeff Çabot (43) və Kris Führixin (45+1) qolları ilə oyunda üstünlüyü ələ alsalar da, ilk hissənin son hücumunda (45+6) Andrey İliç görüşdə tarazlığı bərpa edib.
Bu oyundan sonra “Ştutqart” 41 xalla 11-ci, “Union Berlin” isə 35 xalla 13-cü sıradadır. Berlin təmsilçisi görüşdə qazandığı 1 xal sayəsində bu mövsüm Bundesliqada qalmağı təmin edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
