Canni İnfantino: Bu həftə FİFA-nın 112 illik tarixində ən əlamətdar gün olacaq
Bakı, 22 fevral, AZƏRTAC
FİFA prezidentliyinə namizəd Canni İnfantino seçkiqabağı açıqlama ilə çıxış edib.
AZƏRTAC “Le Figaro”nun saytına istinadla xəbər verir ki, UEFA-nın baş katibi fevralın 26-da təşkil olunacaq seçkinin tarixi önəmini vurğulayıb. İnfantinonun sözlərinə görə, fevralın 26-sı ali futbol qurumunun 112 illik tarixi ərzində ən əlamətdar gün olacaq. Onun fikrincə, 209 üzv ölkə nəinki öz taleyini, həm də FİFA və dünya futbolunun gələcəyini müəyyənləşdirmək imkanına malikdirlər: “FİFA-nın yeni prezidentinin seçkisi və idarəetmə islahatlarının geniş spektri naminə səsvermə təşkilatı yeni etimad, hörmət və kommersiya uğuru yoluna çıxara bilər. Prezident kimi mənə etimad göstərilsə, qurumu yeni inkişaf mərhələsinə çıxaracağım”.
Qeyd edək ki, FİFA prezidentliyi uğrunda Asiya Futbol Konfederasiyasının prezidenti şeyx Salman İbrahim Əl-Xəlifə, İordaniya şahzadəsi Əli ibn Əl-Hüseyn, Cənubi Afrika Respublikasının sabiq naziri Tokyo Seksvale və UEFA baş katibinin sabiq müavini Jerom Şampan da mübarizə aparacaq.
Bölmənin digər xəbərləri
