Astara, 14 avqust, İlkin Adıyev, AZƏRTAC

Azərbaycan Respublikası Milli Məclisinə növbədənkənar seçkilərlə əlaqədar ölkəmizin cənub bölgəsində maarifləndirici treninqlər davam edir.

AZƏRTAC-ın bölgə müxbiri xəbər verir ki, 79 saylı Astara, 71 saylı Cəlilabad, 69 saylı Biləsuvar, 75 saylı Yardımlı-Masallı seçki dairələrində

şəhər, qəsəbə və kənd məntəqə seçki komissiyalarının üzvləri üçün treninqlər təşkil olunub.

Təlimlər gün ərzində iki dəfə olmaqla məntəqə seçki komissiyası üzvlərinin iştirakı ilə keçirilir.

Treninqlərdə səsvermə günü məntəqə seçki komissiyaları üzvlərinin vəzifələri, seçki günü prosedurları və müstəsna hallar, səsvermə məntəqəsinin açılması, seçki qutularının hazırlanması, səslərin hesablanması, seçki bülletenlərinin təsnifatı və yekun protokolun doldurulması və digər məsələlər barədə məlumat verilib.

Hər bir iştirakçıya Mərkəzi Seçki Komissiyası tərəfindən hazırlanan “Seçki günü üçün yaddaş” kitabçası, eləcə də səsvermənin nəticələri haqqında protokol nümunəsi və bir sıra digər zəruri metodiki vəsaitlər, əyani materiallar təqdim olunub.