Bakı, 19 mart, Pərvanə Qafarova, AZƏRTAC

Floristika dekorativ-tətbiqi sənət və dizayn müxtəlifliyidir. Bu populyar istiqamət canlı çiçəklər, yarpaqlar, meyvələr, giləmeyvə salxımları, konfetlər və rəngarəng dekorlar əsasında buketlər hazırlamağa imkan yaradır.

Aytən Məhərrəmova hələ uşaqlıq illərində çiçəkləri və müxtəlif bitkiləri yetişdirməyə və onlara qulluq etməyi sevirdi. Florist xanım AZƏRTAC-ın müxbiri ilə söhbəti əsnasında öz işindən, çiçək və bitkilərin insanların həyatına və sağlamlığına təsirindən bəhs edib.

O deyib: “Bu sənətə sevgim uşaqlıqdan başlayıb. Mən uzun müddətdir dekorasiya ilə məşğulam. Bir gün dostum mənə instaqram səhifəsi açmağı məsləhət gördü. Mən onun məsləhətinə əməl etdim və doqquz ilə yaxındır ki, davam etdirdiyim bir bloqa başladım”.

Həmsöhbətimizin sözlərinə görə, onun fəaliyyətinin inkişafında “ABAD” Ailə Biznesinə Dəstək Mərkəzinin böyük rolu olub: “ABAD-ın dəstəyi sayəsində hobbi biznesə çevrilib. Son iki-üç ildə məhz onların dəstəyi ilə fəaliyyətimizi genişləndirmişik. Onlara bəzilərinin fotoşəkillərdə olduğu əl işlərimi təqdim etdim və böyük məmnuniyyətlə mənimlə əməkdaşlıq etməyə başladılar”.

Brendin loqosunu Aytən Məhərrəmovanın o vaxt cəmi 14 yaşı olan qardaşı qızı çəkib. “Dövlət dəstəyi sayəsində biz öz brendimizi təşkil edərək tam yarada bildik və bu məsələyə ciddi yanaşdıq. Onu da qeyd edim ki, əsərlərim yarmarkalarda, festivallarda təqdim olunub”, - deyə florist deyir.

Aytən xanım gələcək planlarından da danışıb: “Həyat yoldaşım da mənim kimi “ABAD”ın dəstəyi ilə öz biznesini açıb. Müxtəlif bitkilər yetişdirdiyimiz istixanalarımız var. Gələcəkdə bəlkə birlikdə kiçik bir salon və ya butik açacağıq ki, orada əsərlərimizi sataq. Bizim yaxın gələcək üçün böyük planlarımız var: brendi tanıtmaq, genişləndirmək və ya əksinə, bu sahədə daha dərinə getmək”.

İxtisası iqtisadçı olsa da, Aytən xanım yaradıcılıq aləminə qərq olub, sənət və sənətkarlıqla məşğul olub. Sonra çiçək dizayneri öz əl işlərini satışa çıxarmağa başladı. O, bəzi xırda detallardan göz oxşayan, həm də fayda gətirən gözəl əsərlər yaratmağa başlayıb: “Bir çox qadınlar ailəsi ilə sevimli işi arasında seçim etmək məcburiyyətində qalırlar. Amma mən bu dilemma ilə üzləşmək istəmirdim. Niyə də bütün cəhətləri birləşdirməyək; yaxşı ana, yaxşı həyat yoldaşı olmaqla bərabər, həm də sevdiyiniz işlə məşğul ola bilərsiniz”.

Sənətkarın sözlərinə görə, onun üçün çiçəklər parlaq və son dərəcə gözəl bir dünyadır, burada çoxlu yaxşı və xeyirxah, ən əsası isə faydalı məqamlar var. Florariumlar (bitki yetişdirmək üçün nəzərdə tutulmuş şəffaf şüşə qab - red.) yaratmaq ideyası onda Bakıda azərbaycanlı sənətkar qadınların əl işlərindən ibarət xeyriyyə sərgisini ziyarət edərkən yaranıb. “Bundan sonra botanika və çiçəkçiliklə məşğul olmağa başladım. Təəssüf ki, internetdə rus və Azərbaycan dillərində çiçəkçiliklə bağlı çox az məlumat var idi və mən ingilisdilli saytlardan material almalı oldum”, -deyə o xatırlayır.

Aytən Məhərrəmova qeyd edir ki, bitkini əkərkən, torpaq mühüm rol oynayır. O, əvvəlcə adi torpağa çiçəklər əkdi, lakin bir müddət sonra bitki zəiflədi və yarpaqlarını itirdi. Sonra məlum oldu ki, bitkilərin xüsusi torpağa, onların böyüməsinə və çiçək açmasına kömək edən əkin sisteminə ehtiyacı var.

Aytən xanım bunu belə izah edir: “Təbiətlə təmas hər bir insan üçün vacibdir. Xüsusən şəhərdə yaşayanlar üçün. Çünki gündəlik rejim bizə təbiətin gözəlliyindən həzz almağa imkan vermir. Bitkilər və çiçəklər insan sağlamlığı üçün vacib olan mənəvi qidamızdır. Çiçəklər hər evdə olmalıdır. Onlar gözəlliklə yanaşı, insan sağlamlığına da xeyir verir, orqanizmin immunitetini gücləndirir. Hər kəsə məsləhət görürəm ki, evdə öz gülləri olsun. Allergiyadan əziyyət çəkən insanlara əvvəlcədən həkimə müraciət etməyi tövsiyə edirəm, çünki uyğun bitki seçilməlidir. Burada işıqlandırma və bitkiyə qulluq da böyük əhəmiyyət kəsb edir. Çünki elə hallar olur ki, adam gül alır və bir müddət sonra o, quruyub saralır. Burada problem onun səhv seçilməsindədir. Belə məqamlarda mən də onların köməyinə gəlirəm: hər biri üçün fərdi olaraq uyğun olan çiçəyi necə seçməyi, bu bitkinin hansı fayda və ya zərər verə biləcəyini və ona necə qulluq etməyi məsləhət görürəm”.

Florist xanım deyir: “COVID-19 pandemiyası zamanı insanlar ən çox aloeni müalicəvi xüsusiyyətlərinə görə alırdılar. İltihab əleyhinə təsirinə görə aloe şirəsi dəri xəstəliklərinin kompleks müalicəsində də istifadə olunur. Aloe, həmçinin mədə-bağırsaq patologiyası olan insanlar tərəfindən iltihabi prosesləri, xoraları müalicə etmək üçün və həzm şirələrinin ifrazı pozulduqda qəbul edilir. Aloe ilə yanaşı, kalanxoe bitkisi də məşhur idi. Kalanxoenin müalicəvi xüsusiyyətləri bir çox həkimlər tərəfindən qəbul edilir. Həm xalq təbabətində, həm də peşəkar tibb praktikasından bu bitkidən geniş istifadə olunur. Bu gün onun əsasında bir çox resept mövcuddur. Ondan tinktura, həlimlər, məlhəmlər və s. hazırlamaq üçün istifadə edə bilərsiniz. Kalanxoe də antibakterial xüsusiyyətlərə malikdir və havanı dezinfeksiya edir. Bitkilər arasında zəruri amin turşularını əmələ gətirənlər də var”.

Aytən Məhərrəmovanın sözlərinə görə, elə bitkilər var ki, çox gözəldir, ancaq azyaşlı uşaqları, ev heyvanları olanlar, allergiyadan əziyyət çəkənlər onları ala bilmir. O əlavə edir: “Bu bitkilərdən biri də diffenbaxiya (dilsiz qamış) bitkisidir. Çox gözəldir və havanı mükəmməl təmizləyir, amma evdə kiçik uşaqları və ya ev heyvanları olanlara tövsiyə etmirəm, çünki yarpaqla təmasda allergik reaksiya yarana bilər. Allergiyası olan insanlar üçün hipoallergen bitkilər seçirik”.

Həmsöhbətimiz bu il Azərbaycanda keçiriləcək BMT-nin İqlim Dəyişikliyi üzrə Çərçivə Konvensiyasının - COP29-un Tərəflər Konfransının 29-cu sessiyasına da toxunub. O qeyd edib: “Azərbaycan Respublikasının Prezidenti İlham Əliyevin Sərəncamına uyğun olaraq 2024-cü il Azərbaycanda “Yaşıl dünya naminə həmrəylik ili” elan edilib. Təbii ki, biz hamımız, bütün Azərbaycan vətəndaşları öz ekologiyamızı qorumağa, ətraf mühitin qayğısına qalmağa çalışırıq. Sosial şəbəkələrdəki səhifəmdə işlərimi nümayiş etdirmək və bitkilər haqqında faydalı məlumatlar dərc etməklə yanaşı, insanları təbiətimizi qorumağa və mühafizə etməyə çağırıram. Əgər hər bir insan bir ağac, bitki və ya çiçək əkib meşəni, sahilləri və ümumiyyətlə təbiəti çirkləndirməsə, bütün bunlar bütövlükdə planetimizi xilas etmək yolunda böyük bir addım olardı”.

Aytən xanım tez-tez ekoloji tədbirlər təşkil edir. O, bununla bağlı deyir: “Ailəmlə tez-tez şəhərdən kənara gedirəm, sahildə zibil yığıram. Biz bunu təbiətimizi qorumaq naminə edirik, baxmayaraq ki, Azərbaycanda bu xeyirxah işlə bir çox təşkilatlar məşğul olur. Bununla belə, hesab edirəm ki, öz sağlamlığının qeydinə qalmaq, ətraf mühitə qayğı göstərmək hər bir insanın borcudur”.