“Christie's” hərrac evi xristianlığın ilk dövründə yazılan ən qədim əlyazmanı satışa çıxarır
Bakı, 5 aprel, AZƏRTAC
Misirdə xristianlığın ilk dövründə yazılan və hazırda mövcud olan ən qədim əlyazmalardan biri hesab olunan “Krosbi-Şoyen kodeksi” adlı kitab iyunda Böyük Britaniyada hərraca çıxarılacaq.
Yuxarı Misirdəki monastırların birində 40 il ərzində mirzələrdən biri tərəfindən qələmə alınmış 104 səhifəlik (52 vərəqlik) kitab pleksiqlasın (orqanik şüşə - red.) arxasında saxlanılır. Kodeks Pyotrun ilk ismarışından və Yunus peyğəmbərin kitabından ibarətdir.
AZƏRTAC “Christie's” hərrac evinin rəsmi saytına istinadla xəbər verir ki, eramızın 250-350-ci illərində papirus üzərində kopt dilində yazılmış və ilk xristian monastırlarından birində tərtib edilmiş “Krosbi-Şoyen kodeksi” təxminən 2,6-3,8 milyon dollar dəyərində qiymətləndirilir.
“Christie's” hərrac evinin Orta əsrlər və İntibah dövrü əlyazmaları üzrə baş mütəxəssisi Yeugenio Donadoninin sözlərinə görə, bu əlyazma məhz papirus kitabının kodeks formasını almağa başladığı keçid dövrünə aiddir: “Yəni bu gün gördüyümüz kitab formasını nəzərdə tuturam. Bu kitabı dəyərli edən isə onun İncilin iki kitabının bilinən ən erkən mətnlərini ehtiva etməsidir”.
Donadoni, əlyazmanın belə yaxşı vəziyyətdə saxlanılmasını Misirin quraq iqlimi ilə əlaqəli olduğunu izah edərək, bu günə qədər III və IV əsrə aid yalnız bir neçə kitabın salamat qaldığını əlavə edib.
“XX əsrdə və XIX əsrin sonlarında əldə etdiyimiz xristian əlyazmalarının bütün əsas tapıntıları çox spesifik iqlim şəraitinə malik olduğuna görə məhz Misirdə aşkar olunub”, – o deyib.
Kodeks 1950-ci illərdə Misirdə aşkar olunub və 1981-ci ilə qədər saxlanıldığı Mississippi Universiteti tərəfindən satın alınıb. O, 1988-ci ildə norveçli əlyazma kolleksiyaçısı doktor Martin Şoyen tərəfindən satın alınıb və onu dünyanın ən böyük şəxsi əlyazma kolleksiyalarından biri olan Şoyen kolleksiyasındakı bəzi digər eksponatlarla birlikdə hərraca çıxarıb.
Bütün lotlar aprelin 9-dək Nyu-Yorkda, aprelin 18-dən 23-dək isə Parisdə nümayiş məqsədilə təqdim ediləcək. “Christie's” hərracında satış isə iyunun 11-də Londonda keçiriləcək.
Bölmənin digər xəbərləri
