Dağ çaylarında sululuq normadan artıqdır
Bakı, 17 fevral (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamentindən AZƏRTAC-a verilən məlumata görə, fevral ayının birinci yarısında ayrı-ayrı günlərdə temperatur rejiminin nisbətən yüksəlməsi və dağlarda qarın tədricən əriməsi, eyni zamanda son günlər yağıntılarla əlaqədar çaylarda sululuq artmışdır. Bu hal xüsusən Lənkəran-Astara bölgəsinin çaylarında daha artıq müşahidə olunmuşdur.
Hazırda dağ çaylarında sululuq normadan yüksəkdir. Balakən-Şəki bölgəsi çaylarında sululuq ongünlük normanın 220-270, Kiçik Qafqaz çaylarında 125-160, Lənkəran-Astara bölgəsi çaylarında 155-195, Naxçıvan Muxtar Respublikası çaylarında isə 90-180 faizini təşkil edir.
Kür çayının Qıraqkəsəmən məntəqəsində su sərfi 165 kubmetr/san, Qanıx çayının Əyriçay məntəqəsində isə su sərfi 52 kubmetr/san təşkil edir.
Fevral ayının 1-dən bu günə kimi Kür çayının Yevlax məntəqəsində suyun səviyyəsində 104, Zərdabda 138, Surrada 77, Şirvanda 61, Salyanda 43, Bankədə 31, Araz çayının Novruzlu məntəqəsində isə 11 sm artım müşahidə olunmuşdur. Surra məntəqəsində suyun hazırkı səviyyəsi 537, Şirvanda 429, Salyanda 380, Bankədə 317, Araz çayının Novruzlu məntəqəsində isə 261 sm-dir.
2010-cu ilin müvafiq dövrü ilə müqayisədə Kür çayının səviyyəsi Yevlax məntəqəsində 51, Zərdabda 170, Surrada 137, Şirvanda 148, Bankədə 74, Araz çayının Novruzlu məntəqəsində isə 151 sm aşağıdır.
Bölmənin digər xəbərləri
