“Darknet”də nəhəng narkotik platformasına qarşı genişmiqyaslı əməliyyat keçirilib
Berlin, 17 iyun, AZƏRTAC
Almaniya Federal Cinayət İdarəsi (BKA) və Frankfurt Prokurorluğu “Darknet”də fəaliyyət göstərən ən böyük cinayətkar ticarət platformalarından olan “Archetyp Market”a qarşı genişmiqyaslı beynəlxalq əməliyyat aparıb.
AZƏRTAC “Tagesschau” xəbər xidmətinə istinadla xəbər verir ki, beynəlxalq kordinasiya şəraitində keçirilən əməliyyata cəlb edilən 300-dən çox əməkdaş Avropa İttifaqı üzvü olan bir neçə ölkədə 25 axtarış tədbiri həyata keçirib.
Ümumi dövriyyəsi 250 milyon avro təşkil edən platformanın administratoru olan 30 yaşlı Almaniya vətəndaşı Barselonada saxlanılıb. Platformanın fəaliyyətində istifadə edilən server Niderlanddakı bir məlumat mərkəzində polis tərəfindən söndürülüb. “Archetyp Market”in moderator və satıcısı olmaqda şübhəli bilinən şəxslərə qarşı əməliyyatlar Rumıniya, İsveç və Almaniyada həyata keçirilib. İsveçdə yeddi nəfər şübhəli şəxs qismində saxlanılıb.
Axtarış aparılan ünvanlarda onlarla mobil telefon, kompüter, yaddaş daşıyıcıları və ümumi dəyəri 7,8 milyon avro olan əmlak müsadirə edilib.
“Archetyp Market” platformasında əsasən amfetamin, kannabis, fentanil, heroin və kokain kimi narkotik vasitələrin ticarəti aparılıb. Platformada təxminən 17 min satış elanı, 612 min istifadəçi hesabı və 3,2 min satıcı qeydiyyatda olub. Ödənişlər “Monero” adlı kriptovalyuta ilə həyata keçirilib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
