Daşkəndin silkway.uz saytı: Heydər Əliyev fenomeni-sabit iqtisadi-sosial inkişaf və milli birlik
Daşkənd, 18 dekabr, AZƏRTAC
Daşkənddəki silkway.uz saytı ulu öndər Heydər Əliyev haqqında rus dilində “Azərbaycan xalqının müdrik lideri” adlı geniş material verib.
Azərbaycanın Özbəkistandakı səfirliyi və səfirliyin nəzdindəki Heydər Əliyev adına Azərbaycan Mədəniyyət Mərkəzinin təşəbbüsü ilə hazırlanan məqalədə Azərbaycan və özbək xalqları arasındakı dostluq əlaqələrindən, ümummilli lider Heydər Əliyevlə Özbəkistan prezidenti İslam Kərimovun dostluğundan söhbət açılır.
Materialda qeyd olunur ki, bu gün də ölkələr arasında əməkdaşlığın inkişafı istiqamətində mühüm addımlar atılır. Azərbaycan və Özbəkistan prezidentlərinin iştirakı ilə Daşkəndə böyük Azərbaycan şairi Nizami Gəncəvinin, Bakıda isə özbək şairi Əlişir Nəvainin abidələrinin açılması buna gözəl sübutdur. Daşkənd Dövlət Pedaqoji Universiteti yarandığı 1947-ci ildən etibarən böyük şair Nizami Gəncəvinin adını daşıyır.
Yazıda Heydər Əliyevin keçmiş SSRİ-nin rəhbərlərindən biri, həmçinin müstəqil Azərbaycanın lideri kimi fəaliyyəti də geniş şərh edilir. Vurğulanır ki, dünya şöhrətli siyasi xadim Heydər Əliyev Azərbaycan xalqının yaddaşında öz işinin professionalı, təcrübəli təşkilatçı, böyük siyasi düşüncə sahibi, müdrik rəhbər kimi qalıb. Heydər Əliyev fenomeni sabit iqtisadi-sosial inkişaf və milli birlikdir.
Məqalədə Ulu Öndərin memarı olduğu Azərbaycanın neft strategiyasından, o cümlədən Bakı-Tbilisi-Ceyhan əsas ixrac neft kəmərindən də bəhs olunur.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
