Deputat: Azərbaycan beynəlxalq münasibətlər sistemində balanslaşdırılmış və müstəqil siyasət yürüdür
Bakı, 11 fevral, AZƏRTAC
ABŞ Vitse-prezidenti Cey. Di. Vensin Azərbaycana səfəri, həmçinin Prezident İlham Əliyevlə birlikdə mətbuata bəyanatda səsləndirilən fikirlər ikitərəfli münasibətlərin mövcud vəziyyətini və perspektivlərini aydın şəkildə ortaya qoyan mühüm siyasi hadisə kimi qiymətləndirilə bilər. Dövlətimizin başçısının çıxışı təkcə diplomatik protokol xarakteri daşımır, eyni zamanda, regional və qlobal geosiyasi proseslər fonunda Azərbaycanın strateji mövqeyini ifadə edən konseptual mesajlarla zəngindir.
Bu sözləri AZƏRTAC-a açıqlamasında Milli Məclisin deputatı Jalə Əliyeva deyib.
O bildirib ki, Prezident İlham Əliyev bəyanatında Azərbaycan–ABŞ münasibətlərinin uzunmüddətli əməkdaşlıq ənənələrinə əsaslandığını vurğulayaraq, bu əlaqələrin qarşılıqlı hörmət və milli maraqlar prinsipi üzərində qurulduğunu diqqətə çatdırdı. Xüsusilə enerji təhlükəsizliyi, nəqliyyat-logistika marşrutları və regional sabitlik məsələləri prioritet istiqamətlər kimi qeyd olundu. Azərbaycanın Avropanın enerji təhlükəsizliyində oynadığı rolun ABŞ tərəfindən dəstəklənməsi ölkəmizin strateji əhəmiyyətini bir daha təsdiqləyir. Prezidentin bəyanatında Cənub Qaz Dəhlizi və yaşıl enerji layihələrinin xüsusi vurğulanması göstərir ki, Bakı Vaşinqtonla əməkdaşlığı ənənəvi enerji çərçivəsindən çıxararaq, bərpaolunan enerji sahəsində də genişləndirmək niyyətindədir. Prezident İlham Əliyev Azərbaycanın sülh gündəliyinə sadiq olduğunu və regionda uzunmüddətli sabitliyin tərəfdarı kimi çıxış etdiyini qeyd etdi. Bu kontekstdə ABŞ-ın konstruktiv mövqeyi və vasitəçilik təşəbbüsləri dialoqun davam etdirilməsi baxımından əhəmiyyətli amil kimi təqdim olundu. Bəyanatdan aydın olur ki, rəsmi Bakı regional məsələlərin region ölkələri tərəfindən həll edilməsi prinsipini qorumaqla yanaşı, beynəlxalq tərəfdaşlarla əməkdaşlığa da açıqdır.
Deputat qeyd edib ki, Prezidentin çıxışında iqtisadi sahədə əməkdaşlığın genişləndirilməsi perspektivləri də xüsusi yer aldı. ABŞ şirkətlərinin Azərbaycandakı fəaliyyəti, investisiya mühiti və qeyri-neft sektorunun inkişafı istiqamətində görülən işlər diqqətə çatdırıldı. Azərbaycanın tranzit və logistika imkanlarının genişləndirilməsi, xüsusilə Orta Dəhlizin aktuallığı ABŞ üçün də strateji maraq kəsb edən amil kimi qiymətləndirilə bilər. Bu məqam Azərbaycanın yalnız enerji ixracatçısı deyil, həm də regional nəqliyyat qovşağı kimi mövqeyini gücləndirdiyini göstərir. Prezidentin bəyanatı iqtisadi diplomatiyanın siyasi dialoqla paralel şəkildə inkişaf etdiyini nümayiş etdirir. Bəyanatın siyasi mahiyyəti ondan ibarətdir ki, Azərbaycan beynəlxalq münasibətlər sistemində balanslaşdırılmış və müstəqil siyasət yürüdür. Prezident İlham Əliyev çıxışında ölkəmizin milli maraqlara əsaslanan xarici siyasət kursunu bir daha təsdiqlədi. ABŞ kimi qlobal güc mərkəzi ilə yüksək səviyyəli təmaslar Azərbaycanın beynəlxalq nüfuzunun artmasının göstəricisidir. Eyni zamanda, bəyanat diplomatik üslub baxımından konstruktiv və praqmatik idi. Qarşılıqlı hörmət, suverenliyə dəstək və əməkdaşlıq prinsipləri əsas xətt kimi təqdim olundu. Bu yanaşma Azərbaycanın həm Qərb, həm də digər beynəlxalq tərəfdaşlarla paralel münasibətlər qurmaq strategiyasına uyğun gəlir.
Jalə Əliyeva diqqətə çatdırıb ki, Prezident İlham Əliyevin strateji tərəfdaşlığın möhkəmləndirilməsi, regional sülhün təşviqi və iqtisadi əməkdaşlığın genişləndirilməsi baxımından mühüm siyasi mesajlarla zəngin olan bu bəyanatı Azərbaycan–ABŞ münasibətlərində yeni mərhələnin konturlarını müəyyənləşdirir. ABŞ Vitse-prezidentinin ölkəmizə səfəri ilə bağlı olaraq verilən bu bəyanat göstərir ki, Azərbaycan qlobal dəyişikliklər fonunda öz mövqeyini daha da gücləndirir, balanslı və milli maraqlara əsaslanan siyasət kursunu ardıcıl şəkildə davam etdirir. ABŞ ilə dialoqun dərinləşməsi isə həm regional sabitliyə, həm də ölkəmizin beynəlxalq rolunun artmasına xidmət edən mühüm amil kimi çıxış edir.
Bölmənin digər xəbərləri
