Deputat: Bu gün Azərbaycan iqtisadi və sosial layihələri paralel apara bilən ölkədir
Bakı, 14 yanvar, AZƏRTAC
Prezident İlham Əliyevin istər xarici jurnalistlərin, istər yerli medianın, istərsə də dünyanın beyin mərkəzlərinin nümayəndələrinin suallarını cavablandırarkən Azərbaycanın region ölkələri ilə yanaşı, dünya dövlətlərinin də tərəqqisinə və inkişafına xidmət edən siyasət yürütdüyünü bəyan edir. Dövlətimizin başçısı son müsahibəsində Azərbaycanın apardığı siyasi və iqtisadi siyasətin məqsədinin dünyada sülhün bərqərar edilməsinə, eləcə də bütün dövlətlərin iqtisadi inkişafına təkan verilməsinə kömək göstərmək olduğunu vurğuladı. Artıq əminliklə söyləyə bilərik ki, Vətən müharibəsində Qələbəmizdən sonra dünya ictimaiyyəti Azərbaycanın yaratdığı yeni reallığı və ölkəmizin ədalət uğrunda mübarizə apardığını qəbul edib.
Bunu AZƏRTAC-a açıqlamasında Milli Məclisin deputatı Kamilə Əliyeva deyib.
Deputat bildirib ki, Prezidentin apardığı xarici siyasət nəticəsində beynəlxalq təşkilatlar, böyük dövlətlər Azərbaycanı etibarlı və dost dövlət kimi qəbul edirlər. Azərbaycan dünyada azsaylı dövlətlərdəndir ki, müstəqil xarici və iqtisadi siyasət yürüdür. Müharibədə qazandığımız şanlı Qələbə bütün dünyaya Azərbaycanın iqtisadi və siyasi cəhətdən güclü dövlət olduğunu sübut etdi. Müsahibəsində Prezident İlham Əliyevin qeyd etdiyi kimi, müharibə bitsə də, mübarizəmiz hələ də davam edir. Ermənistan və onun havadarları başa düşməlidirlər ki, Azərbaycan dünya üçün çox əhəmiyyətli bir dövlətdir, bu gün ölkəmizin böyük, güclü dövlətlərlə tərəfdaşlıq və dostluq əlaqələri mövcuddur.
Qeyd edilib ki, hazırda dünyada baş verən ərzaq qıtlığı və bunun nəticəsində yaranan kəskin bahalaşma Azərbaycandan da yan keçməyib. Lakin dövlətimizin başçısı tərəfindən həyata keçirilən sosial layihələr Azərbaycan vətəndaşlarının bu böhranlı vəziyyətdən daha az itki ilə çıxmasına xidmət edir. Dağıdılmış ərazilərini yenidən qurmaqla bərabər, belə böyük sosial layihələrin reallaşdırılması onu göstərir ki, Azərbaycan iqtisadiyyatı dayanıqlı və möhkəm təməllərə əsaslanır. Bu gün Azərbaycanla dünyanın ən böyük maliyyə institutlarından olan Dünya Bankı, Avropa Yenidənqurma və İnkişaf Bankı arasında böyük iqtisadi əlaqələr qurulub, nəhəng layihələr başa çatdırılmaqdadır, həmçinin yeni istiqamətlər barədə də müzakirələr aparılır. Bu, Azərbaycan dövlətinə və dövlətimizin başçısına olan inam və etibarın nümunəsidir.
“Sübut olunmuş faktdır ki, iqtisadi və sosial layihələri paralel apara bilməyən ölkələrdə insanlar iqtisadi islahatlardan əziyyət çəkirlər. Amma ölkəmizdə Prezident İlham Əliyev tərəfindən iqtisadi və siyasi layihələr paralel həyata keçirilir. Dövlətimizin başçısı reallaşdırdığı bu layihələrin uğurlu icrasının nəticəsidir ki, əhalinin qiymət artımından əziyyət çəkməsinin qarşısı alınmaqdadır. Əhalinin sosial vəziyyətinin yaxşılaşdırılması məqsədilə ölkəmizdə minimum əməkhaqqı, pensiyalar, sosial müavinətlər artırılıb. Şəhid ailələri və müharibə əlillərinə hər zaman dövlətimiz tərəfindən diqqət və qayğı göstərilir. Bu kateqoriyadan olan minlərlə insan dövlət tərəfindən mənzillərlə təmin olunub və bu proses davam etdirilir”, - deyə Kamilə Əliyeva qeyd edib.
Prezidentin çıxışında Qərbi Azərbaycandan deportasiya olunmuş azərbaycanlıların hüquqlarının təmin edilməsi barədə də fikirlərinə də toxunan deputat diqqətə çatdırıb ki, tarix boyu yüz minlərlə soydaşımız doğma torpaqları olan Qərbi Azərbaycandan zorla qovulub. Bu gün doğma torpaqlarına qayıtmaq onların hüququdur. Vaxt gələcək Qarabağa qayıdan soydaşlarımız kimi Qərbi Azərbaycandan olan soydaşlarımız üçün də bu ərazilərə Böyük Qayıdış prosesi reallaşacaq.
“Bu gün Azərbaycan dövlətinin nüfuzu durmadan artır. Beynəlxalq aləmdə o qədər də nüfuzu olmayan Qoşulmama Hərəkatı məhz Azərbaycanın sədrliyi dövründə dünya siyasətinə təsir edə biləcək bir təşkilata çevrilib. Azərbaycan artıq iqtisadi, siyasi, hərbi cəhətdən dünyanın öndəgedən dövlətlərindən sayılır”, - deyə Kamilə Əliyeva vurğulayıb.
Bölmənin digər xəbərləri
