Deputat: Dördüncü sosial islahatlar zərfi vətəndaşların rifah halını gücləndirəcək
Bakı, 13 yanvar, AZƏRTAC
2019-cu ildən Prezident İlham Əliyevin rəhbərliyi ilə Azərbaycanda dərin sosial islahatlar aparılır və son beş ildə dörd sosial islahatlar zərfi qəbul edilib. Bu il yanvarın 5-də və 13-də Prezidentin imzaladığı fərman və sərəncamlarla ölkə üzrə minimum əməkhaqqı qaldırıldı. Dövlət büdcəsi sektorunda çalışan bütün kateqoriyadan olan vahid tarif cədvəli üzrə əməkhaqqı alanların maaşlarının 15 faiz artırılması təmin olundu. Eyni zamanda, özəl sektorda çalışan 450 min vətəndaşımızın da əməkhaqqının artırılmasına real şərait yaradıldı.
Bu sözləri AZƏRTAC-a açıqlamasında Milli Məclisin Əmək və sosial siyasət komitəsinin sədri Musa Quliyev deyib.
Komitə sədri bildirib ki, bununla əlaqədar olaraq Prezidentin Sərəncamı ilə pensiyaların indeksasiya edilməsi təxminən bütün növdən olan pensiyaların 15 faiz artmasına imkan verdi. Pensiyanın minimum məbləğinin 240 manatdan 280 manata qaldırılması ilə bağlı Prezidentin hökumətə verdiyi tapşırıq da icra olunandan sonra bütün kateqoriyalardan olan təxminən 100 mindən çox pensiyaçının təqaüdünün minimum məbləği artırılacaq.
Musa Quliyevin sözlərinə görə, Prezidentin yanvarın 13-də verdiyi fərman və sərəncamlar 25-dən çox istiqamətdə həssas qruplardan olan vətəndaşlarımızın sosial təminatının yaxşılaşmasına səbəb olacaq. Burada müxtəlif növ müavinətlərin, Prezident təqaüdlərinin, tələbə təqaüdlərinin, fəxri adları olan elmlər doktoru, elmlər namizədi olan pensiyaçıların və Əməkdar artist, Xalq artisti fəxri adı olanların, Əməkdar jurnalist, Əməkdar elm xadimi, Əməkdar həkim, Əməkdar təhsil işçisi və digər kateqoriyadan olan vətəndaşlarımızın da pensiyalarının artırılmasına şərait yaradılacaq. Bütövlükdə dördüncü sosial islahatlar paketi 2 milyona yaxın vətəndaşımızın sosial rifah halına müsbət təsir göstərəcək, 750 milyon manatdan çox əlavə büdcə vəsaiti tələb edəcək.
“Sərəncamlara əsasən, həmçinin şəhid ailələri üçün verilən Prezident təqaüdündə çox ciddi artımlar var. Digər istiqamət uşaqlara verilən müavinətlərlə bağlıdır. Uşağın doğulmasına görə verilən birdəfəlik müavinətin 300 manatdan 500 manata qaldırılması, dəfn müavinətlərinin məbləğinin və çoxuşaqlı ailələrə verilən uşaq pulu müavinətinin artırılması kimi digər məsələlər uşaqların sosial müdafiəsinin gücləndirilməsinə öz töhfəsini verəcək. Bütövlükdə Prezidentin qəbul etdiyi dördüncü sosial islahatlar zərfi Azərbaycan vətəndaşının rifah halının güclənməsinə səbəb olacaq. Onu da nəzərə alsaq ki, hökumətin proqnozlarına görə, bu il ölkə üzrə inflyasiya birrəqəmli həddə düşəcək və 7 faiz təşkil edəcək. Müxtəlif istiqamətlər üzrə 15-30 faiz arasında olan artımların vətəndaşların sosial rifahının qorunmasında ciddi əhəmiyyəti olacaq”, - deyə Milli Məclisin deputatı qeyd edib.
Bölmənin digər xəbərləri
