Bakı, 16 iyun, AZƏRTAC

2021-ci il iyunun 15-i tariximizin ən parlaq və ən şanlı səhifələrindən biri kimi yaddaşlarda qalacaq. Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın imzaladıqları müttəfiqlik haqqında Şuşa Bəyannaməsi iki qardaş dövlətin münasibətlərinin yeni mərhələsinin başlanğıcı hesab oluna bilər.

Bunu AZƏRTAC-a açıqlamasında Milli Məclisin deputatı Fatma Yıldırım deyib.

Deputat bildirib ki, Türkiyə Prezidenti Rəcəb Tayyib Ərdoğanın Şuşaya səfəri tariximizin mühüm səhifələrindən birini təşkil edir. Şuşada iki ölkənin dövlət başçıları tərəfindən müttəfiqlik haqqında Bəyannamənin imzalanması isə Azərbaycan-Türkiyə münasibətlərinə öz möhürünü vurdu. Burada ən mühüm məqam ondan ibarətdir ki, tərəflər təhlükəsizlik amilinə xüsusi önəm verirlər. Belə ki, Bəyannamədə müdafiə sahəsində əməkdaşlıq və qarşılıqlı hərbi yardım məsələləri öz əksini tapır. Bu, tarixi nailiyyətdir. Bu, bir daha göstərir ki, biz bundan sonra da hər zaman bir yerdə olacağıq, bundan sonra da bir-birimizin təhlükəsizliyini təmin edəcəyik. Necə ki, bu günə qədər Türkiyə və Azərbaycan bütün məsələlərdə bir yerdədir, bundan sonra da belə olacaq. Yəni, Türkiyə Azərbaycana qarşı hərbi təcavüzü özünə qarşı, Azərbaycan da Türkiyəyə olan hərbi təcavüzü özünə qarşı təcavüz kimi dəyərləndirəcək və bu məsələdə bir birinə açıq dəstək verəcək. Bu amil Ermənistana və onun havadarlarına qarşı ciddi mesajdır.

“Bəyannamənin Qarabağın gözü olan tarixi Şuşa şəhərində imzalanması isə xüsusi məna kəsb edir. Ermənilər və onların havadarları, revanşistlər anlamalıdırlar ki, əgər Azərbaycana və onun ayrılmaz hissəsi olan Qarabağa nə vaxtsa yenidən hərbi təcavüz etmək niyyətinə düşərlərsə, qarşılarında Türkiyəni də görəcəklər. Bəyannamənin Şuşa şəhərində imzalanması hər iki ölkənin bu məsələdə qətiyyətli mövqeyinin ifadəsidir. 1921-ci ildə Naxçıvanın təhlükəsizliyi məqsədilə imzalanan Qars müqaviləsindən 100 il sonra Türkiyə növbəti müqavilə ilə Qarabağın təhlükəsizliyinin qarantına çevrildi”, - deyə deputat qeyd edib.

Fatma Yıldırım diqqətə çatdırıb ki, Şuşada Türkiyənin konsulluğunun açılması dostuq və qardaşlığımızın növbəti nümunəsi olacaq. Həmçinin ölkəmizdə pilotsuz uçuş aparatlarının istehsalı müəssisəsinin yaradılması da nəzərdə tutulur ki, bu da hərbi sənayemizin inkişafında ciddi amil olacaq.

Sənəddə digər vacib məqamlardan biri də geosiyasi əhəmiyyətə malik olan birgə nəqliyyat layihələri ilə bağlıdır. Bəyannamədə Zəngəzur dəhlizinin açılması ilə bağlı çox açıq ifadələr öz əksini tapıb. Bu da İkinci Qarabağ savaşından sonra yaranmış yeni geosiyasi vəziyyətin nəticəsidir. Bu gün biz Türkiyə ilə Azərbaycanı dəmiryolu və avtomobil yolu ilə birləşdirəcək Zəngəzur dəhlizi haqqında nəinki danışırıq, biz əməli, praktiki işlərlə bu dəhlizi yaradırıq.

Türkiyə Prezidentinin öz ailəsi ilə birlikdə qədim Şuşa şəhərini ziyarət etməsinin tarixi hadisə olduğunu bildirən deputat qeyd edib: “Şuşaya gedərkən yol boyu Prezident Rəcəb Tayyib Ərdoğan və ailə üzvləri erməni vandalizminin canlı şahidi oldular. Amma bütün bunlar arxada qaldı. Hazırda Qarabağda quruculuq işləri həyata keçirilir və bu prosesdə Türkiyə şirkətləri də yaxından iştirak edirlər. İnanırıq ki, qısa müddətdə doğma Qarabağımız cənnət məkana çevriləcək. Heydər Əliyev Fondu tərəfindən Cıdır düzündə təşkil olunmuş ədəbi-bədii kompozisiya isə milli-mədəni ənənələrimizi, Şuşanın mədəniyyətimizin beşiyi olduğunu bir daha təsdiqlədi”.

Deputat söyləyib ki, bundan sonra Azərbaycanla Türkiyənin birliyi daha da möhkəmlənəcək: “Prezidentimiz cənab İlham Əliyevin dediyi kimi Azərbaycanla Türkiyənin qardaşlığı sarsılmazdır, Prezident Ərdoğanın dediyi kimi, Türkiyənin gücü Azərbaycanın gücü, Azərbaycanın gücü isə Türkiyənin gücüdür”.