Dövlət Xidməti: Hərracda 20 dövlət əmlakı özəlləşdirilib
Bakı, 3 may, AZƏRTAC
İqtisadiyyat Nazirliyi yanında Əmlak Məsələləri Dövlət Xidməti tərəfindən mayın 2-də keçirilən növbəti hərraca müxtəlif obyektlər, o cümlədən nəqliyyat vasitələri çıxarılıb.
Dövlət Xidmətindən AZƏRTAC-a bildirilib ki, budəfəki hərracda 2 səhmdar cəmiyyətin səhm paketləri, 1 obyekt və 17 nəqliyyat vasitəsi özəlləşdirilib. Dövlət əmlakının özəlləşdirilməsi sahəsində elektron xidmətlərin tətbiqi, sifariş və onlayn şəkildə hərraclara qatılmaq imkanı alıcıların marağını artırır. Bütün bunlar isə hərracı daha da rəqabətli edir.
Mayın 2-də keçirilən hərracda avtomobillərdən birinin qiyməti 3 dəfə çox artıb. Belə ki, start
qiyməti 11 min manat olan “Mercedes Benz Sprinter” markalı avtomobilə ən son təklif 36 min manat olub. Hərracda özəlləşdirilən səhmdar cəmiyyətlərinin səhm paketləri “Cəlilabad Məişət” ASC-yə və "Xudat Kəndnəqliyyat" ASC-yə məxsusdur. Özəlləşdirilən obyekt isə Qazax rayonu, Qazaxbəyli kəndində yerləşən mağazadır. Əmlakın ümumi faydalı sahəsi 108 kvadratmetr, torpaq sahəsi isə 300 kvadratmetrdir. Bu əmlak torpaq sahəsi ilə birgə özəlləşdirilib. Hərracda satılan əmlaklar üzrə dövlət büdcəsinə 231 min 156 manat vəsaitin ödənilməsi nəzərdə tutulur.
Hərracda özəlləşdirilən dövlət əmlaklarının siyahısı ilə https://clck.ru/33ihWp linki vasitəsilə tanış olmaq mümkündür. Növbəti hərraclar mayın 16-da və 23-də keçiriləcək və satışa 57 əmlak çıxarılacaq.
Bölmənin digər xəbərləri
