Dubayda ulu öndər Heydər Əliyevin xatirəsi anılmışdır
Bakı, 13 dekabr (AZƏRTAC). Azərbaycan Respublikasının Birləşmiş Ərəb Əmirliyindəki səfirliyi ulu öndər Heydər Əliyevin xatirəsinin anım günü ilə bağlı Dubay Əmirliyindəki “Raffles” mehmanxanasında tədbir keçirmişdir.
Səfirlikdən AZƏRTAC-a bildirmişlər ki, mərasimdə Dubayda yaşayan həmvətənlərimiz, Azərbaycan Beynəlxalq Bankının bu şəhərdəki ofisinin əməkdaşları və burada təhsil alan azərbaycanlı tələbələr iştirak etmişlər.
Tədbiri açan səfir Elxan Qəhrəmanov ümummilli lider Heydər Əliyevin həyat yolu və fəaliyyəti haqqında geniş məlumat vermişdir. Diplomat 1993-cü ildə əbədiyaşar Prezidentimizin hakimiyyətə qayıdışından sonra yürütdüyü uzaqgörən siyasət nəticəsində qısa müddətdə dövlətimizin sürətlə inkişaf etdiyini, Azərbaycanın dünya dövlətləri ilə müxtəlif sahələrdə səmərəli əməkdaşlıq münasibətləri qurduğunu bildirmişdir. Səfir əsasını ulu öndər Heydər Əliyevin qoyduğu uzaqgörən siyasətin Prezident İlham Əliyevin rəhbərliyi altında uğurla davam etdirildiyini tədbir iştirakçılarının diqqətinə çatdırmışdır.
Sonra dünyanın tanınmış elm və siyasi xadimlərinin Heydər Əliyev haqqında söylədikləri fikirləri əks etdirən film nümayiş olunmuşdur.
Bölmənin digər xəbərləri
