Ekspert: Ermənistan beynəlxalq sənədlərin müddəalarından irəli gələn vəzifələri yerinə yetirmir
Bakı, 8 iyul, AZƏRTAC
İnsanların sağlamlığı üçün təhlükəsiz ətraf mühitin olması zəruridir. Xəstəliklərin 25 faizdən çoxu ekoloji faktorlar səbəbindən yarandığından təhlükəsiz ətraf mühitin olması əhalinin davamlı sağlamlığının təminatıdır.
Bunu AZƏRTAC-a açıqlamasında “İnkişafa Doğru Qadın Təşəbbüsü” İctimai Birliyin sədri Ziba Nəbiyeva deyib.
İctimai Birliyin sədri bildirib ki, sağlam ekoloji mühit, təmiz hava və su insanın həyatı üçün ən əhəmiyyətli məsələlərdir. Hər kəsin sağlam ətraf mühitdə yaşamaq hüququ var. Bu insanın fundamental hüquqlarından biridir. Bu məsələ ilk dəfə 1972-ci ildə BMT-nin “Ətraf mühitə dair” Stokholm konfransında geniş müzakirə olunub. BMT-nin Dayanıqlı İnkişaf Məqsədlərində isə təmiz hava, təhlükəsiz içməli su və sanitariya kimi amillər sağlamlığın ətraf mühit amilləri kimi tanınıb.
Onun sözlərinə görə, sağlam ətraf mühitdə yaşamaq hüququ dövlətlərin qarşısında ətraf mühiti qorumaq vəzifəsini də qoyur. Çox təəssüflər ki, Ermənistan tərəf olduğu beynəlxalq sənədlərin müddəalarını, beynəlxalq öhdəliklərindən irəli gələn vəzifələri yerinə yetirmək əvəzinə regionda destruktiv siyasət apararaq BMT-nin Dayanıqlı İnkişaf Məqsədlərini, xüsusən “Yaxşı Səhiyyə və Rifah” üzrə 3-cü, “Təmiz su və Sanitariya” ilə bağlı 6-cı, Məsuliyyətli İstehsal və İstehlak üzrə 12-ci, “İqlim Dəyişikliyinin Fəsadlarına qarşı Mübarizə”yə dair 13-cü, “Torpaq Ekosisteminin Mühafizəsi” üzrə 15-ci Məqsədlərini ciddi şəkildə pozur. İqtisadi fəaliyyət insan hüquqlarına ziyan vurulmadan həyata keçirilməlidir. Bu halda da Ermənistan məsuliyyətsiz davranaraq təmiz, sağlam və davamlı ətraf mühit hüququna məhəl qoymadan, ekoloji nasazlıq yaradaraq sırf özünün iqtisadi maraqlarını önə çəkir. Ermənistanın dağ-mədən sənayesi Cənubi Qafqaz regionunu ciddi ekoloji fəlakətlə üz-üzə qoyub. Təsadüfi deyil ki, bir müddət əvvəl Ermənistanda fəaliyyət göstərən 60-dan çox vətəndaş cəmiyyəti təşkilatı Amuldağ (Amulsar) mədəninin fəaliyyətinin bərpası ilə bağlı ətraf mühitə vura biləcəyi ziyana görə həyəcan təbili çalıb.
“Azərbaycanın ekoloji və səhiyyəyönümlü vətəndaş cəmiyyəti təşkilatları da Ermənistanın baş naziri Nikol Paşinyana açıq məktubla müraciət ediblər. Məktubda 12 fakt üzrə törədilmiş ekoloji ziyan - ağır metal tərkibli mədən tullantılarının yaratdığı təhlükə, su hövzələrinin çirkləndirilməsi, çirkab suların Oxçuçay, Araz və Kür çaylarına axıdılması barədə ətraflı məlumat əks olunub. Bununla yanaşı, QHT-lər müraciətində beynəlxalq standart və prinsipləri nəzərə alaraq Ermənistanın dağ-mədən sənayesi obyektlərində qiymətləndirmə və monitorinq aparılması üçün Azərbaycanın aidiyyəti sahə üzrə mütəxəssisləri və vətəndaş cəmiyyəti təşkilatları üçün tam şəraitin yaradılması qeyd olunub. Həmçinin etibar, inklüzivlik və ortaq məsuliyyəti gücləndirmək üçün dialoq platformalarının yaradılması tövsiyə edilib. Ermənistan hökumətini məsuliyyətli idarəetməyə, regionumuza, planetimizə təhlükə yaradan dağ-mədən sənayesindəki işləri dərhal dayandırmağa, region əhalisi üçün davamlı inkişafı, sağlam gələcəyi təmin edən qərarlar qəbul etməyə çağırış edilib.
Sonda vurğulamaq istərdim ki, ətraf mühiti gələcək nəsillər naminə qoruyub saxlamaq uğrunda mübarizə aparmalıyıq. Təbiətə etinasız yanaşmanın nəticələri çox ağır ola bilər”, - deyə vurğulayıb.
Bölmənin digər xəbərləri
