Ermənistanın yekun sülh sazişindən yayınmaq üçün heç bir şansı qalmayıb - Ekspert rəyi
Bakı, 11 avqust, AZƏRTAC
Azərbaycan və Ermənistan rəhbərlərinin Vaşinqtonda keçirilən görüşləri zamanı əldə edilən nəticələrə, o cümlədən sülh sazişinin paraflamasına, Prezident Donald Trampın iştirakı ilə Birgə Bəyannamənin imzalanmasına verilən reaksiyalar onu göstərir ki, “ABŞ platforması”nı həzm edə bilməyən güc mərkəzləri mövcuddur. Bu mərkəzlər xüsusi olaraq “Beynəlxalq Sülh və Rifah naminə Tramp Marşrutu” adı altında “Zəngəzur dəhlizi”nin açılmasına qarşıdırlar.
Onlar Azərbaycanla Ermənistan arasında sülhün əldə edilməsini, kommunikasiyaların bərpasını, nəqliyyat dəhlizlərinin açılmasını özlərinin Cənubi Qafqazda təsir rıçaqlarının itirilməsi kimi dəyərləndirirlər.
Həm dolayısı ilə, həm də birbaşa mesajlar verərək təhdid edirlər, kommunikasiya xətləri üzrə razılaşmanın əleyhinə çıxırlar. Bu cür açıqlamalar məxsusi olaraq İranın və Rusiyanın fərqli strukturları tərəfindən son iki gün ərzində daha intensiv şəkildə verilir.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
O deyib: “2020-ci ildə və ondan sonra baş verən hadisələr sübut etdi ki, Azərbaycanı heç bir təhdidlə yolundan döndərmək, geri çəkilməyə məcbur etmək mümkün deyil. Azərbaycan özünün bacarıqlı diplomatiyası, praqmatik xarici siyasət kursu və güclü ordusu ilə istənilən təhdidləri dəf etmək iqtidarındadır. Milli maraqlarını qorumaq üçün yetərli potensiala malikdir. Amma biz eyni ifadələri Ermənistan barədə işlədə bilmirik. Müşahidə olunan hal budur ki, Ermənistanın hər hansı bir təhdiddən qorunmaq taktikası “bir güc mərkəzindən ayrılıb digər güc mərkəzinə sığınmaq” metoduna əsaslanır. Ölkənin xarici siyasət kursu “himayəçi dövlətin” siyasi konyukturasına görə dəyişir. Bu baxımdan Ermənistanın indiki təhdidlər qarşısında nə qədər dözə biləcəyi, razılaşmalara nə dərəcədə sadiq qalacağı həssaslıqla izlənilir.
“Ermənistanın mövcud hakimiyyəti üçün digər bir təhdid diaspor qurumlarından və daxili müxalifətdən qaynaqlanır. Onlar Ermənistan konstitusiyasının dəyişdirilməsi tələbinin sülh sazişinin şərti kimi gündəmə gətirilməsindən narazıdırlar. Vaşinqton Bəyannaməsi yekun sülh sazişinin imzalanması üçün Ermənistan konstitusiyasının dəyişdirilməsini tələb etməyə zəmin yaradır. Bəyannamədə qeyd edilir ki, “biz sazişin imzalanması və yekun olaraq ratifikasiyası üçün əlavə tədbirlərin görülməsinə ehtiyac olduğunu qəbul edirik”. Bu bənd konstitusiyanı dəyişmək üçün Ermənistanın üzərinə öhdəliklər qoyur. Daxili müxalifət və diaspor qurumları isə bu fakta istinad edərək hərəkətlənirlər, Nikol Paşinyan hakimiyyətini təhdid edirlər.
Ermənistan hakimiyyəti mövcud təhdidlər qarşısında boyun əyib yekun sülh sazişini imzalamaqdan yayınacaqmı? Yoxsa özündə güc tapıb prosesi davam etdirəcəkmi? Təhlillər göstərir ki, prosesi yubatmaq, yekun sülh sazişinin imzalanmasını gecikdirmək, yaxud Vaşinqtonda üzərinə götürdüyü öhdəliklərdən yayınmaq Ermənistan hakimiyyəti üçün daha ağır perspektivlər vəd edir. Azərbaycanla uzunmüddətli münaqişə vəziyyətində olması Ermənistanı bütün beynəlxalq layihələrdən təcrid edib, iqtisadiyyatını tükəndirib, hərbi potensialını məhv edib. Əhali sayı son 30 il müddətində 20 faizə qədər azalmış Ermənistanın indən sonra da münaqişə vəziyyətində qalması onun insan resurslarının tamamilə tükənməsinə yol aça bilər. Əlavə olaraq, bu ölkənin sülh sazişindən yayınması ABŞ-a və şəxsən Prezident Trampa qarşı hörmətsizlik olar ki, bu da ağır nəticələr doğura bilər. Bütün bunlar deməyə əsas yaradır ki, Ermənistan yekun sülh sazişini imzalamaq üçün nə qədər tez addımlar atsa, bir o qədər xeyrinə olacaq”, - deyə M.Ələsgərli əlavə edib.
Bölmənin digər xəbərləri
