Fərid Abbasov: Gənc şahmatçılarımız məsul yarışlara hazırlaşırlar
Bakı, 20 mart, AZƏRTAC
Gənc şahmatçılarımızı bir sıra məsul yarışlar gözləyir. Bütün yarışlar və turnirlər təxirə salınsa da, onlayn şəkildə dərsləri davam etdiririk. Komandamız bu ilin ikinci yarısında Avropa və dünya çempionatlarında iştirak edəcək. On altı yaşadək şahmatçılar arasında Ümumdünya Şahmat Olimpiadası oktyabr ayında Naxçıvan şəhərində keçiriləcək. Bütün bu yarışlarda komandamızın uğurla çıxış etməsi üçün böyük şansları var.
Bu sözləri yeniyetmələrdən ibarət yığma komandanın baş məşqçisi, beynəlxalq qrossmeyster Fərid Abbasov AZƏRTAC-a müsahibəsində deyib.
On altı yaşadək şahmatçılardan ibarət komandamızın Türkiyənin Çorum şəhərində keçirilən Olimpiadanın qalibi olduğunu bildirən məşqçi, şahmatçılarımızın bu uğuru təkrarlayacaqlarına ümidvar olduğunu söyləyib. Qeyd edib ki, kişi şahmatçılar arasında mart ayında keçirilməsi planlaşdırılan Azərbaycan çempionatı qeyri-müəyyən müddətə təxirə salınıb. Məşqçi bu yarışın böyük ehtimalla may ayında baş tutacağını da vurğulayıb.
Bölmənin digər xəbərləri
