FİNALDA ERMƏNİ İDMANÇISINI MƏĞLUB EDƏN AZƏRBAYCAN GÜLƏŞÇİSİ AVROPA ÇEMPİONU OLMUŞDUR
Bakı, 31 mart (AZƏRTAC). Azərbaycanın sərbəst güləşçiləri martın 31-də Vilnüsdə start götürmüş Avropa çempionatına uğurla başlamışlar.
Azərbaycan komandasının heyətində möhtəşəm qələbəni isə ən ağır çəkidə yarışan Əli İsayev (120 kq) göstərmişdir. Ardıcıl olaraq, Yunanıstan və Türkiyə idmançılarını məğlub edən Ə.İsayev finalda Ermənistan təmsilçisi Ruslan Basiyev üzərində parlaq qələbə qazanaraq Avropa çempionu tituluna sahib çıxmışdır.
Bu, Azərbaycan idmançılarının yarışın ilk günü qazandıqları 3-cü medal olmuşdur. Ə.İsayevdən əvvəl döşək üzərinə çıxan Cəbrayıl Həsənov (66 kq) yalnız finalda ukraynalı Andrey Stadnikə məğlub olaraq ikinci yeri tutmuşdur. Qeyd edək ki, A.Stadnik Azərbaycanın qadın güləşi üzrə yığma komandasının üzvü Mariya Stadnikin həyat yoldaşıdır.
84 kiloqram çəki dərəcəsində yarışan Novruz Temrezov isə bürünc medal əldə etmişdir.
Qitə çempionatının ikinci günü döşək üzərinə çıxacaq Azəbaycan idmançılarının rəqibləri artıq məlum olmuşdur. Püşkə əsasən, Zəlimxan Hüseynov (60 kq) yunanıstanlı Aleksandros Plavidis, Çamsulvara Çamsulvarayev (74 kq) fransalı Luka Lampis, Hetaq Qazyumov (96 kq) Macarıstan təmsilçisi Daniel Liqeti ilə qarşılaşacaqdır.
######
 |
 |
Bölmənin digər xəbərləri
