Gələn ilin büdcəsi Azərbaycanın milli təhlükəsizliyinin möhkəmlənməsi üçün strateji təminatdır ŞƏRH
Bakı, 21 noyabr, Səbinə Əlizadə, AZƏRTAC
2026-cı il dövlət büdcəsində müdafiə və milli təhlükəsizlik xərclərinin 8,7 milyard manat səviyyəsində müəyyən edilməsi Azərbaycanın milli təhlükəsizliyinin möhkəmləndirilməsi baxımından strateji zərurətdir. Bu rəqəm ölkə təhlükəsizliyinin təmin olunması, ordunun modernləşdirilməsi və yeni geosiyasi reallıqlara uyğun müdafiə konsepsiyasının gücləndirilməsi üçün mühüm maliyyə əsasını formalaşdırır.
Bu fikirləri AZƏRTAC-a açıqlamasında Milli Məclisin deputatı Hikmət Babaoğlu deyib.
Onun sözlərinə görə, Azərbaycan bu günə qədər müdafiə və təhlükəsizlik sahəsinə ayırdığı vəsait hesabına ordusunu gücləndirərək regionda sabitlik yarada bilib. Lakin yaranmış yeni reallıq bu sabitliyin davamlı şəkildə qorunmasını tələb edir.
“Azərbaycanın lehinə dəyişən hərbi-siyasi üstünlük bəzi regional və transregional aktorlar tərəfindən birmənalı qarşılanmır. Bu səbəbdən təhlükəsizlik sahəsində hər hansı boşluğun hiss edilməsi dərhal ölkəmizə qarşı təzyiqlərin artmasına gətirib çıxara bilər. Prezident İlham Əliyevin qeyd etdiyi kimi, biz çox ağır layları yerindən oynatmışıq və bu, müəyyən güc mərkəzlərinin emosional reaksiyasına səbəb olur”, - deyə deputat vurğulayıb.
Deputat bildirib ki, məhz buna görə 2026-cı il büdcəsində müdafiə və milli təhlükəsizlik məsələləri əsas prioritet kimi müəyyən edilib və bunun tərkibində 5 milyard manat həcmində vəsait müdafiə təyinatlı layihələrin icrasına yönəldilib. Bu vəsait ordunun təchizatının, hərbi sənayenin modernləşdirilməsinin və yeni hərbi-texnoloji imkanların tətbiqinin genişləndirilməsinə xidmət edir.
Hikmət Babaoğlu qeyd edib ki, Prezident İlham Əliyev təhlükəsizlik məsələlərini çoxşaxəli yanaşma ilə qiymətləndirərək kiber təhlükəsizlik, informasiya təhlükəsizliyi, ideoloji təhlükəsizlik və digər istiqamətlərin paralel şəkildə gücləndirilməsinin vacibliyini xüsusi vurğulayır. “Bu sahələrin hamısını bir ümumi təhlükəsizlik sistemi kimi dəyərləndirdikdə aydın olur ki, hərbi-siyasi təhlükəsizlik birinci dərəcəli əhəmiyyət daşıyır. Bu baxımdan xüsusi təyinatlı qüvvələrin sayının artırılması, onların ən müasir müdafiə və təhlükəsizlik vasitələri ilə təchiz edilməsi dövlətimizin əsas prioritetlərindəndir”, – deyə deputat əlavə edib.
Onun sözlərinə görə, ordunun peşəkarlığının yüksəldilməsi ilə yanaşı, onun təminatının, müasir silah və hərbi texnikanın alınmasının yüksək səviyyədə təşkili müdafiə xərclərinin artırılmasını zəruri edən başlıca amillərdəndir. “Hər bir Azərbaycan vətəndaşının təhlükəsizliyi milli təhlükəsizliyin gücündən asılıdır. Təhlükəsizlik zəif olduğu halda bir dövlətin hansı acıları yaşaya biləcəyini biz 30 il ərzində çox yaxşı gördük. Müstəqilliyimizin ilk illərində təhlükəsizlik məsələlərinin təmin edilməməsi böyük itkilərə səbəb oldu və ölkəmiz bunun nəticələrini uzun illər yaşadı”, - deyə deputat qeyd edib.
H.Babaoğlu bildirib ki, hazırda əldə olunan üstünlüklərin itirilməməsi, əksinə daha da gücləndirilməsi üçün müasir təhlükəsizlik siyasəti büdcədə öz əksini tapmalıdır: “Azərbaycanın müdafiə qabiliyyətinin gücləndirilməsi təkcə hərbi amillərlə məhdudlaşmır, həm də müdafiə sənayesinin inkişafı, ordunun modernləşdirilməsi və Türkiyə Ordusu modelinin vahid konseptual yanaşma ilə tətbiqi kimi strateji istiqamətləri əhatə edir”.
Deputat vurğulayıb ki, Azərbaycanın təhlükəsizliyi, eyni zamanda, ölkədən keçən və çoxsaylı dövlətlərin milli təhlükəsizliyi baxımından əhəmiyyətli olan beynəlxalq kommunikasiya və nəqliyyat xətlərinin təhlükəsizliyi ilə birbaşa bağlıdır. “Zəngəzur dəhlizinin, Trans-Xəzər Rəqəmsal İpək Yolunun, habelə Trans-Xəzər su nəqliyyatı dəhlizinin təhlükəsizliyinin əsas təminatçısı Azərbaycan Ordusudur. Bu baxımdan təhlükəsizlik məsələlərinə təkcə regional deyil, həm də qlobal müstəvidə yanaşmaq vacibdir”, - deyə H.Babaoğlu qeyd edib.
O, sonda bildirib ki, 2026-cı il dövlət büdcəsi təhlükəsizliyin təmin olunması və qarşıdakı strateji vəzifələrin icrası baxımından optimal maliyyə çərçivəsi formalaşdırır: “Bu büdcə Azərbaycanın milli təhlükəsizliyinin davamlı möhkəmləndirilməsinə, əldə edilən nailiyyətlərin qorunmasına və yeni strateji hədəflərin reallaşmasına etibarlı təminat verir”.
Bölmənin digər xəbərləri
