“Gənc turizm liderləri–2” düşərgəsi təşkil olunub
Bakı, 23 iyun, AZƏRTAC
Gənclər və İdman Nazirliyinin dəstəyi, Dövlət Turizm Agentliyi və Azərbaycan Turizm və Menecment Universitetinin (ATMU) tərəfdaşlığı ilə Quba şəhərində “Gənc turizm liderləri–2” düşərgəsi təşkil olunub.
Bu barədə AZƏRTAC-a ATMU-dan məlumat verilib. Açılış mərasimində Azərbaycan Turizm və Menecment Universitetinin, Gənclər və İdman Nazirliyinin və Dövlət Turizm Agentliyinin nümayəndələri çıxış edərək turizm sahəsində gənclərin fəal iştirakından və onların gələcəkdə milli turizm siyasətində oynayacaqları roldan danışıblar.
ATMU-nun təhsil məsələləri üzrə rektor müşaviri Fərid Cabbarlı bildirib ki, bu layihə ölkəmizin turizm sənayesinin inkişaf etdirilməsi, turizm siyasətinin həyata keçirilməsi, turizm potensialının xarici bazarlarda tanıdılması baxımından genişmiqyaslı işlər görmək üçün tələbələrə dəstək xarakteri daşıyır.
Gənclər və İdman Nazirliyinin əməkdaşı Əli İsgəndərli çıxış edərək, ölkəmizdə turizm sahəsinə töhfə olaraq keçirilən və gənc turizmçilərə dəstək məqsədi daşıyan bu cür layihələrin böyük əhəmiyyət daşıdığını vurğulayıb.
Dövlət Turizm Agentliyinin Turizm siyasəti və strategiyası şöbəsinin müdir müavini Günay Bayramova tələbələri belə layihələrdən faydalanmağa çağırıb.
Üç gün davam edən düşərgənin əsas məqsədi “Əylənərək öyrənirik” metodu əsasında gənclərin turizm sahəsində bilik və bacarıqlarının qeyri-formal təhsil alətləri vasitəsilə inkişaf etdirilməsi olub. Eyni zamanda, tədbir iştirakçılarda innovativ düşüncə tərzinin formalaşmasına və liderlik keyfiyyətlərinin güclənməsinə xidmət edib.
Düşərgə çərçivəsində gənclərə ölkəmizin turizm sektorunda onların rolunun əhəmiyyəti aşılanıb. Bildirilib ki, bu cür təşəbbüslər gənc turizmçilərin gələcək karyera yollarında stimul rolunu oynayır və onların peşəkar inkişafına töhfə verir.
Qeyd edək ki, düşərgənin planına şəhər turu, master-klaslar, idman oyunları, təlimlər və sair daxil olub. ATMU-nun tələbələri Quba Soyqırımı Memorial Kompleksini ziyarət ediblər. Qubadakı Qırmızı qəsəbədə ekskursiyada olublar.
Bölmənin digər xəbərləri
