Gəncədə “II Mirzə Göygöl Beynəlxalq Bitki Genetik Ehtiyatları Simpoziumu” keçirilir
Gəncə, 19 avqust, Elcan Məmmədov, AZƏRTAC
Azərbaycan Milli Elmlər Akademiyasının (AMEA) Gəncə Bölməsində “II Mirzə Göygöl Beynəlxalq Bitki Genetik Ehtiyatları Simpoziumu” öz işinə başlayıb.
AZƏRTAC-ın bölgə müxbiri xəbər verir ki, simpozium Türkiyə və Azərbaycanın, eləcə də bütün Türk dünyasının görkəmli alimi, bitki genetik ehtiyatları sahəsində zəngin elmi irs qoymuş professor Mirzə Göygölün xatirəsinə həsr olunmuş tədbirdə Azərbaycan və Türkiyə ilə yanaşı, dünyanın 20-dən çox ölkəsinin kənd təsərrüfatı tədqiqatları üzrə mütəxəssisləri iştirak ediblər.
Hibrid formada təşkil olunan tədbirin açılışında çıxış edən Elm və Təhsil Nazirliyi Genetik Ehtiyatlar İnstitutunun direktoru AMEA-nın müxbir üzvü Zeynal Əkpərov diqqətə çatdırıb ki, simpoziumun əsas məqsədi qlobal ərzaq təhlükəsizliyinin təminatında, bioloji müxtəlifliyin qorunmasında və kənd təsərrüfatının davamlı inkişafında əvəzolunmaz rol oynayan bitki genetik ehtiyatlarının qorunması, tədqiqi və istifadəsinə dair bilik və təcrübələrin paylaşılması, elmi əməkdaşlıq əlaqələrinin gücləndirilməsi və yenilərinin qurulması ilə bağlı beynəlxalq elmi platformanın yaradılması, həmçinin Mirzə Göygöl irsinin tanıdılmasından ibarətdir.
Digər çıxış edənlər də bitki genetik ehtiyatlarının dəyərinə, bu ehtiyatların mühafizəsi və səmərəli istifadəsi ilə bağlı problemlərə diqqət çəkərək simpoziumun əsas müzakirə predmetlərini təşkil edən məsələlər – yerli və unudulmaqda olan sortların aşkar edilməsi, bərpası, eləcə də onların yabanı əcdad və qohum növlərinin toplanması, genbanklarda mühafizəsi, müasir molekulyar-genetik və bioinformatik texnologiyalar vasitəsilə səciyyələndirilməsi, məlumat bazalarının yaradılması kimi fəaliyyətlərin qlobal ərzaq təhlükəsizliyində dayanıqlılığın təmin olunması üçün olduqca zəruri olduğunu bildiriblər.
Plenar iclasda isə AMEA-nın müxbir üzvü Zeynal Əkpərovun “Mirzə Göygölün bitki genetik ehtiyatları elminə verdiyi töhfələr”, Türkiyə Respublikası Kənd Təsərrüfatı və Meşə Təsərrüfatı Nazirliyinin Kənd Təsərrüfatı Tədqiqatları və Siyasətləri Baş İdarəsinin (TAGEM) təmsilçisi professor Fatih Özdemirin “TAGEM-in biomüxtəlifliyi qoruma strategiyaları”, Birmingem Universitetinin professoru Naycl Makstedin “Bitki genetik ehtiyatlarının mühafizəsi və istifadəsində çətinliklər və imkanlar: irəliləmənin daha təkmil yolunu seçməyin vaxtı” mövzularında məruzələri dinlənilib. Həmçinin Tekirdağ Namık Kemal Universitetinin professoru Evren Cabi “Türkiyədə buğdanın yabanı qohumları”, Quraq Ərazilərdə Kənd Təsərrüfatı Tədqiqatları üzrə Beynəlxalq Mərkəzin nümayəndəsi Mesut Keser “Seleksiya prosesində yerli buğda sortlarının istifadəsi və onların fermer təsərrüfatlarında və seleksiya proqramlarında dəyişən statusu: Türkiyə nümunəsi” mövzularında məruzələrlə çıxış ediblər. Məruzəçilər iştirakçıların suallarını cavablandırıblar.
Simpozium işini bölmə iclası ilə davam etdirib.
Qeyd edək ki, simpozium Genetik Ehtiyatlar İnstitutu, Türkiyə Respublikası Kənd Təsərrüfatı və Meşə Təsərrüfatı Nazirliyinin Ege Kənd Təsərrüfatı Tədqiqatları İnstitutunun (ETAE) təşkilatçılığı, eləcə də Azərbaycan Dövlət Aqrar Universiteti (ADAU), Azərbaycan Respublikası Kənd Təsərrüfatı Nazirliyi Bitki Mühafizə və Texniki Bitkilər Elmi-Tədqiqat İnstitutunun və AMEA-nın Gəncə Bölməsinin dəstəyi ilə keçirilir.
Bölmənin digər xəbərləri
