Gülüş terapiyası narahatlığı azaldır, həyat məmnuniyyətini artırır - ARAŞDIRMA
Bakı, 12 avqust, AZƏRTAC
Jaen Universitetinin tədqiqatçıları tərəfindən aparılan araşdırmaya əsasən, gülüş terapiyası böyüklərdə narahatlıq səviyyəsini əhəmiyyətli dərəcədə azaldır və həyat məmnuniyyətini artırır.
AZƏRTAC “MedicalXpress” portalına istinadla xəbər verir ki, araşdırma barədə məlumat “Journal of Happiness Studies” jurnalında dərc olunub. Bildirilib ki, araşdırma 1991-2024-cü illərdə həyata keçirilmiş 33 randomizə edilmiş klinik sınağın nəticələrini birləşdirib. Ümumilikdə 2 min 159 yetkin (təxminən 74 faizi qadın) iştirakçını əhatə edən bu sınaqlar səhiyyə və sosial mühitlərdə aparılıb. Araşdırmanın nəticələrinə görə, gülüş terapiyası narahatlığın idarəedilməsinə və həyat məmnuniyyətinin artmasına böyük təsir göstərib. Xüsusilə gülüş yoqası tətbiqlərində bu göstəricilər daha yüksək olub. Nəticələr, həmçinin göstərib ki, onlayn gülüş terapiyası minimal təsir göstərir, bu isə sosial qarşılıqlı əlaqənin əhəmiyyətini vurğulayır.
Tədqiqatçılar hesab edirlər ki, gülüş terapiyası psixoloji rifahın artırılmasında təsirli vasitədir.
Bölmənin digər xəbərləri
