Həmvətənimiz Moskvada travmatologiya və ortopediya klinikası açmışdır
Moskva, 11 yanvar (AZƏRTAC). Moskvanın Lyublino rayonunda 1 nömrəli ortopediya və travmatologiya klinikası açılmışdır. Artıq uğurla fəaliyyət göstərən bu klinikanın təsisçisi həmvətənimiz, professor Aqşin Bağırovdur.
Əsas profili ortopediya və travmatologiya olan bu klinikada xəstələrin planlaşdırılmış və təcili qaydada konservativ və operativ müalicəsi aparılır. Klinikada ayaqların əyriliyinin düzəldilməsi, baldırın və budun uzadılması, onurğa və oynaq xəstəliklərinin müalicəsi, iri oynaqların endoprotezləşdirilməsi, ayaq pəncələrində “sümükcük”lərin çıxarılması, sümüklərin zədələnməsi və əyilməsi hallarının digər növlərinin müalicəsi həyata keçirilir.
Klinikanın nəzdində fəaliyyət göstərən poliklinikada xəstələri travmatoloq və ortopedlərlə yanaşı stomatoloq, ginekoloq, uroloq-androloq, cərrah, fleboloq və terapevt həkimlər də qəbul edir. Klinika müasir diaqnostik avadanlıqla təchiz edilmişdir. Bu avadanlıq multispiral (16 kəsikdə) kompyuter tomoqrafiyası, rentgen diaqnostikası (rəqəmsal aparatda), ultrasəs müayinəsi (ən müasir “Toshiba” aparatları ilə), qastroskopiya əməliyyatları aparmağa imkan verir. Burada ekspress analizlər, EKQ, SMOD, holter və digər analizlər də aparılır.
Klinikanın stasionar bölməsində əməliyyat blokunun olması mürəkkəb cərrahi müdaxilələr aparmağa və əməliyyatdan sonra xəstələri müşahidə etməyə imkan verir. Burada ətraflar və onurğa sütunu üzərində əməliyyatlar, endoskopik texnikadan istifadə edilməklə müxtəlif əməliyyat müdaxilələri aparılır. Vena xəstəlikləri zamanı yüksək tezlikli radio dalğaları ilə işləyən aparatdan istifadə edilir.
Klinikada peşəkar hazırlıqlı personal - professorlar, tibb elmləri doktorları və namizədləri, ali kateqoriyalı həkimlər çalışır.
Klinikanın rəhbəri - tibb elmləri doktoru, professor Aqşin Bağırov Azərbaycan Tibb İnstitutunun müalicə fakültəsini bitirmiş, N.N.Piroqov adına Mərkəzi Travmatologiya və Ortopediya İnstitutunun aspirantura və doktoranturasında təhsilini davam etdirmişdir. A.Bağırov 7 ixtiranın, 2 patentin və 5 səmərələşdirmə təklifinin, habelə 36-dan çox elmi işin müəllifidir. Onun rəhbərliyi altında iki namizədlik dissertasiyası müdafiə edilmişdir. O, Belçikada keçirilən “Avro-2002” sərgisində təbabət sahəsində qazandığı nailiyyətlərə görə qızıl medal ilə təltif olunmuşdur.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
