İsveçdə siyasətçilərə qarşı təhdidlərin sayı artıb
Stokholm, 18 oktyabr, Nərgiz Cəfərli, AZƏRTAC
İsveç siyasətçilərinə qarşı təhdid və hücumların sayı sürətlə artır.
AZƏRTAC xəbər verir ki, İsveçin Cinayətkarlığın Qarşısının Alınması üzrə Milli Şurasının (Brå) “Siyasi təhlükəsizlik” araşdırmasına görə, son on ildə hədə və ya təzyiqə məruz qalan siyasətçilərin sayı iki dəfə artıb.
2022-ci ildə təxminən hər üç siyasətçidən biri belə hadisələr barədə məlumat verib.
Çərşənbə günü Mərkəz Partiyasının lideri Anna-Karin Hatt istefa etdiyini elan edərək, üzləşdiyi nifrət və təhdidlərin ona təsəvvür edə biləcəyindən daha çox təsir etdiyini bildirib. Onun qərarı İsveçdə siyasətçilərə qarşı zorakılıq və aqressiya probleminin nə qədər ciddi olduğunun göstəricisidir.
Riksdaq üzvləri və sosial mediada aktiv olan xadimlər xüsusilə həssasdır. İnternet təcavüzün əsas mənbəyinə çevrilib. Onlayn təhdidlərin sayı 2012-ci ildən 2022-ci ilə qədər iki dəfə artıb.
“Brå”nın məlumatına görə, onlar ən çox orta yaşlı yad kişilərdən və müxtəlif qruplara bağlı şəxslərdən olur. Təhdidlərdə ən böyük pay sahibi ifrat sağçı və irqçi təşkilatlardır (insidentlərin təxminən 17 faizi). Halbuki radikal sol qruplar bunların təxminən 8 faizinə məsuliyyət daşıyır. 16 faiz hallarda təhdid mənbəyi digər siyasətçilər, çox vaxt rəqib partiyalardır. Fiziki zorakılıq və vandalizmə isə az rast gəlinir, lakin siyasətçilərə qarşı düşmənçilik səviyyəsi artmaqda davam edir.
Bölmənin digər xəbərləri
