MASALLIDA RUS DİLİ MÜƏLLİMLƏRİ ÜÇÜN SEMİNAR-TRENİNQ KEÇİRİLMİŞDİR
Masallı, 23 may (AZƏRTAC). Masallı şəhərindəki Heydər Əliyev Muzeyində rayonun rus dili müəllimləri üçün seminar-treninq keçirilmişdir.
Tədbirin iştirakçıları əvvəlcə ümummilli lider Heydər Əliyevin adını daşıyan parkda ulu öndərin abidəsinin önünə gül dəstələri düzərək, xatirəsini ehtiramla yad etmişlər.
Rayon təhsil şöbəsinin müdiri Nurəddin Məlikov tədbiri giriş sözü ilə açaraq, rayonun 99 ümumtəhsil məktəbində rus dilinin tədrisi sahəsində əldə edilmiş nailiyyətlərdən danışmışdır.
Seminar-treninqdə yazıçı-publisist, əməkdar jurnalist, Milli Məclisin deputatı Elmira Axundova, “Luç” Yaradıcılıq Assosiasiyasının prezidenti, professor Həsən Quliyev, Bakı Slavyan Universitetinin professoru Çingiz Bədəlov, Rusiyanın Azərbaycandakı səfirliyinin əməkdaşı, filologiya elmləri doktoru, professor Ənvər Şeyxov çıxış edərək, ümummilli lider Heydər Əliyevin Azərbaycan-Rusiya strateji əməkdaşlığının yaranmasında, ölkələrimiz arasında müxtəlif sahələrdə, o cümlədən mədəni sahədə əlaqələrin möhkəmləndirilməsindəki xidmətlərini yüksək qiymətləndirmiş, bu gün də bu əlaqələrin hər iki dövlətin başçıları tərəfindən uğurla davam etdiyini diqqətə çatdırmışlar.
Seminar-treninqdə Rusiyanın müxtəlif şəhərlərində təhsil almaq üçün şagirdləri hazırlamaq məqsədilə rayonun iki müəlliminin Moskva şəhərində ixtisasartırma kursu keçmək, iki şagirdin isə oxumaq üçün Sankt-Peterburqa göndərilməsi təklif olunmuşdur.
Məktəblilər rus dilində S.Vurğunun, A.Puşkinin, M.Lermontovun və S.Yeseninin şeirlərindən parçalar söyləmiş, “Luç” Yaradıcılıq Assosiasiyasının üzvləri rus dilində yazdıqları şeirləri oxumuşlar.
Tədbirdə rayonun ümumtəhsil məktəblərində rus dili fənninin tədrisini yaxşılaşdırmaq məqsədilə təkliflər verilmiş, iştirakçıları maraqlandıran suallar cavablandırılmışdır.
Bölmənin digər xəbərləri
