MİLLİ MƏCLİS “KONSTİTUSİYA MƏHKƏMƏSİ HAQQINDA” QANUN QƏBUL ETMİŞDİR
Sonra Prezident Heydər Əliyevin əziz xatirəsi bir dəqiqəlik sükutla yad edilmişdir.
Ümummilli liderimiz Heydər Əliyevin adının əbədiləşdirilməsi ilə bağlı məsələyə toxunan Murtuz Ələsgərov demişdir ki, parlamentə bununla bağlı çoxlu müraciət daxil olmaqdadır. Təkliflər ümumiləşdirilərək öyrənilir. Milli Məclisin növbəti iclasında bu məsələ geniş müzakirə olunacaqdır.
Parlamentin sədri onu da demişdir ki, ümumxalq matəmi ilə bağlı Milli Məclisin işində bir qədər fasilə olmuşdur. Payız sessiyasının iş planına daxil edilmiş, amma bu günə qədər qəbul olunmamış bir sıra qanunlar vardır. Ona görə də Milli Məclisin işinin yanvar ayında daha 10-15 gün uzadılması zərurəti yaranmışdır.
Sonra gündəlikdə duran məsələlərin müzakirəsinə başlanılmışdır.
Milli Məclisin hüquq siyasəti və dövlət quruculuğu məsələləri daimi komissiyasının sədri Əli Hüseynov “Konstitusiya Məhkəməsi haqqında” qanun layihəsi barədə məlumat vermişdir. O demişdir ki, layihənin birinci və ikinci oxunuşda müzakirəsi zamanı səslənmiş irad və təkliflər diqqətlə öyrənilmiş və məqbul sayılanlar nəzərə alınmışdır. Əli Hüseynovun şərhindən sonra layihə səsə qoyularaq qəbul olunmuşdur.
İqtisadi siyasət daimi komissiyasının sədri Səttar Səfərov Hesablama Palatasının 2004-cü il üzrə xərclər smetası haqqında məlumat vermişdir. Hesablama Palatasının 2004-cü il iqtisadi təsnifat üzrə xərclər smetasında 3 milyard 400 milyon 881 min manat vəsait nəzərdə tutulmuşdur. Bunun 897 milyon 72 min manatı Palatanın ştatlı işçiləri üçün əmək haqqı, 376 milyon 898 min manatı Dövlət Sosial Müdafiə Fonduna köçürmədir. Qalan vəsait isə Palatanın digər xərcləri üçün nəzərdə tutulmuşdur.
Layihə təsdiq olunduqdan sonra “Şəkərli diabet xəstəliyinə tutulmuş şəxslərə dövlət qayğısı haqqında”, “Mülki dövriyyədə olmasına yol verilməyən əşyaların (mülki dövriyyədən çıxarılmış əşyaların) siyahısı haqqında”, “Azərbaycan Respublikasının Mülki Məcəlləsinə əlavələrin və dəyişikliklərin edilməsi haqqında” qanun layihələri müzakirə olunaraq qəbul edilmişdir.
Günün ikinci yarısında Milli Məclis öz işinə başlayarkən deputatlara bildirildi ki, İsveçrə Federal məclisi qondarma erməni soyqırımı haqqında qərar qəbul etmişdir. Qeyd olunmuşdur ki, Azərbaycan Respublikasının Milli Məclisi bu ədalətsiz qərarla əlaqədar bəyanat hazırlamışdır.
Milli Məclisin deputatı Bahar Muradova deputatları həmin bəyanatla tanış etdi. Deputatlar bəyanatla bağlı öz fikir və mülahizələrini, təkliflərini bildirdilər.
Azərbaycan Respublikası Milli Məclisinin bəyanatı səsə qoyularaq yekdilliklə qəbul edildi. Həmin bəyanatı beynəlxalq təşkilatlara göndərmək qərara alındı.
Sonra Milli Məclis “İctimai televiziya və radio yayımı haqqında” Azərbaycan Respublikası Qanunu layihəsinin müzakirəsini ikinci oxunuşda davam etdirdi. Müzakirələrdə deputatlar çıxış edərək xalqın bütün təbəqələrinə xidmət edən bitərəf, demokratik prinsiplərə əsaslanan ictimai televiziya, onun idarəetmə orqanlarının yaradılması, fəaliyyətinin müəyyən edilməsi ilə bağlı fikirlərini söylədilər. Qanuna irad və təkliflərini bildirdilər.
Qanun layihəsinin müzakirəsini Milli Məclisin dekabrın 24-də keçiriləcək iclasında davam etdirmək qərara alındı.
Bölmənin digər xəbərləri
