Moskvada MDB ölkələrinin Turizm Şurasının iclası keçiriləcəkdir
Bakı, 12 mart (AZƏRTAC). AZƏRTAC MDB İcraiyyə Komitəsinin mətbuat xidmətinə istinadla xəbər verir ki, martın 14-də Moskvada Turizm sahəsində əməkdaşlıq haqqında Sazişin iştirakçısı olan dövlətlərin Turizm Şurasının iclası keçiriləcəkdir.
İclas iştirakçıları 10-a yaxın məsələni, o cümlədən MDB-nin 20 illiyinə həsr edilmiş Tədbirlər Planının və 2011-2012-ci illər üçün humanitar əməkdaşlıq sahəsində Prioritet Tədbirlər Planının həyata keçirilməsinin gedişini müzakirə edəcək, Turizm Şurası haqqında Əsasnamə layihəsinin razılaşdırılması haqqında informasiyanı dinləyəcəklər.
Şura üzvləri 2012-2013-cü illərdə Birlik ölkələrində Gənclərin Beynəlxalq Əməkdaşlığı Strategiyasının həyata keçirilməsinə dair Tədbirlər Planının layihəsi barədə təklifləri də müzakirə edəcəklər. Bu təkliflər, məsələn, Moskvada həyata keçirilməsi nəzərdə tutulan “Birliyin iştirakçısı olan dövlətlərin milli muzey inciləri şəhərlərimizin küçələrində” adlı sərgi layihəsi, MDB üzvü olan bütün ölkələrdə keçirilməsi nəzərdə tutulan beynəlxalq turizm sərgi-yarmarkaları gənclər arasında mədəni-öyrədici turizmin inkişafına istiqamətlənmişdir.
Təkliflərin siyahısında YUNESKO-nun “Dünya irsi” proqramına daxil edilmiş kulturoloji təyinatlı obyektlərin siyahısı əsasında MDB üzvü olan dövlətlərin həmin dövlətlərin ərazilərindən keçən və “Varyaqlardan yunanlara aparan yolun izi ilə” mövzusunda transsərhəd turizm marşrutlarının yaradılması barədə təklif də vardır.
İclasda Birlik ölkələrinin müvafiq profilli KİV-lərinin nümayəndələri üçün Azərbaycanın regionlarına mətbuat turu təşkil edilməsi və “Belarus Respublikasının qonaq kartı”nın tətbiq edilməsi üzrə işlər müzakirə ediləcəkdir.
Şuranın iclasından sonra, martın 15-də MDB məkanında mədəni-öyrədici turizmin inkişafı məsələlərində əməkdaşlıq və razılaşdırılmış siyasət formalaşdırılmasına həsr edilmiş I Beynəlxalq konfrans keçiriləcəkdir.
Xatırladaq ki, 2011-ci il Birlik məkanında Tarixi-Mədəni İrs İli elan edilmişdir. Bu, gələcəkdə turizm sahəsində əməkdaşlığın daha da möhkəmləndirilməsi və təkmilləşdirilməsi üçün yeni imkanlar açır.
Bölmənin digər xəbərləri
