Müdafiə Nazirliyinin bir qrup hərbi qulluqçusu təltif olunub – SƏRƏNCAM
Bakı, 25 iyun, AZƏRTAC
İyunun 25-də Azərbaycan Respublikasının Prezidenti İlham Əliyev Müdafiə Nazirliyinin bir qrup hərbi qulluqçusunun təltif olunması ilə bağlı sərəncamlar imzalayıb.
AZƏRTAC xəbər verir ki, dövlətimizin başçısının Sərəncamına əsasən, 5 hərbi qulluqçuya “general-mayor” ali hərbi rütbəsi verilib.
Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndiklərinə görə 131 hərbi qulluqçu orden və medallarla təltif olunub. Onlardan 21 nəfəri ölümündən sonra orden və medallara layiq görülüb. Hərbçilərdən 4 nəfər “Azərbaycan Bayrağı”, 3 nəfər 3-cü dərəcəli “Rəşadət”, 9 nəfər 3-cü dərəcəli “Vətənə xidmətə görə” ordenləri ilə təltif edilib. Bundan başqa, 34 nəfər “Vətən uğrunda” (16 nəfər ölümündən sonra), 22 nəfər “İgidliyə görə”, 20 nəfər “Cəsur döyüşçü”, 17 nəfər “Döyüşdə fərqlənməyə görə”, 1 nəfər “Suqovuşanın azad olunmasına görə” (ölümündən sonra), 2 nəfər “Xocavəndin azad olunmasına görə” (ölümündən sonra), 1 nəfər “Kəlbəcərin azad olunmasına görə” (ölümündən sonra), eləcə də 18 nəfər “Hərbi xidmətlərə görə” medallarına (1 nəfər ölümündən sonra) layiq görülüb.
Bölmənin digər xəbərləri
