Naxçıvan Muxtar Respublikası təhsil işçilərinin konfransı keçirilib
Naxçıvan, 11 sentyabr, AZƏRTAC
Sentyabrın 11-də Naxçıvan Muxtar Respublikası təhsil işçilərinin sentyabr konfransı keçirilib. Konfransda muxtar respublikanın təhsil müəssisələrinin rəhbərləri, Təhsil Nazirliyinin əməkdaşları, qabaqcıl müəllimlər iştirak ediblər.
AZƏRTAC xəbər verir ki, konfransda təhsil naziri Rəhman Məmmədov 2022-2023-cü tədris ilində təhsil sahəsində görülən işlər və qarşıda duran vəzifələrlə bağlı məruzə edib. Bildirib ki, 2023-cü ildə də təhsil quruculuğu sahəsində işlər davam etdirilib, fevral ayının 1-də Babək rayon Vayxır, 9-da Ordubad rayon Xanağa, 23-də Şərur rayon Həmzəli, martın 15-də Şərur rayon Vərməziyar kənd tam orta məktəbləri, iyunun 14-də isə STEAM Təlim-Tədris Mərkəzi istifadəyə verilib. Şahbuz və Babək rayonu üzrə məktəbdənkənar təhsil müəssisələrinin, 954 şagird yerlik Nehrəm qəsəbə 3 nömrəli tam orta məktəbinin, 456 yerlik Hacıvar kənd tam orta məktəbinin, 270 şagird yerlik Azadkənd tam orta məktəbinin binasının yenidən qurulması, Şərur rayon Təzəkənd tam orta məktəbinin əsaslı təmiri, Naxçıvan şəhər 4 nömrəli tam orta məktəbdə isə bərpa-gücləndirmə işləri istiqamətində işlər davam etdirilməkdədir.
Qeyd olunub ki, “Heydər Əliyev İli” çərçivəsində təhsil müəssisələrində Ümummilli Lider Heydər Əliyevin həyat və yaradıcılığına həsr edilmiş 13 diskussiya, 154 dəyirmi masa, 213 açıq dərs, 78 tədbir keçirilib. Diqqətə çatdırılıb ki, hesabat dövründə təhsilverənlərlə iş sahəsində mühüm işlər diqqətdə saxlanılıb, təhsilin inkişafında xidmətlərinə görə 4 müəllim Azərbaycan Respublikasının Əməkdar müəllimi, 4 müəllim Naxçıvan Muxtar Respublikasının Əməkdar müəllimi fəxri adı ilə, 4 müəllim isə “Tərəqqi” medalı ilə təltif olunub. Hesabat dövründə müəllimlərin işə qəbulu üzrə keçirilən müsabiqələrdə uğurlu nəticə qazanan gənc kadrlardan 230-u müəllim kimi fəaliyyətə başlamış, 1000-dən çox müəllim müxtəlif təlim və konfranslara cəlb edilmiş, 2 müəllim qrant müsabiqənin qalibi olmuşdur.
Təhsil naziri muxtar respublika şagirdlərinin əldə etdiyi uğurlardan da danışaraq bildirib ki, cari tədris ilində istedadı ilə fərqlənən şagirdləri aşkara çıxarmaq, onların potensialını inkişaf etdirmək məqsədilə olimpiada hərəkatı gücləndirilib, 2022-2023-cü tədris ilində 5000-ə yaxın şagird olimpiada və fənn müsabiqələrində iştirak edib, onlardan 42-si birinci yer, 77-si ikinci yer, 132-si isə üçüncü yer olmaqla 132-si qalib olub. Beynəlxalq STEAM Azərbaycan Festivalında muxtar respublika məktəbliləri 1-ci, 2-ci və 3-cü yerlərin qalibi olub. Həmçinin Bakı şəhərində keçirilən Dünya Robot Olimpiadasında iştirak edərək ölkə birincisi olmuş muxtar respublika məktəbliləri, 7-9 noyabr tarixlərində Panama Respublikasında keçiriləcək olimpiadanın final mərhələsində ölkəmizi təmsil edəcəklər.
Ölkə üzrə keçirilən “Sabahın alimləri” müsabiqəsində Naxçıvandan 7 şagird 6 layihə ilə iştirak edib. Müsabiqədə 1 layihə 2-ci yerə, 2 layihə isə beynəlxalq qurumların mükafatlarına layiq görülüb.
Diqqətə çatdırılıb ki, ümumtəhsil məktəblərini tam orta təhsil bazasından bitirən məzunlardan 20-si qızıl, 24-ü gümüş nişana, 32-si fərqlənmə attestatına, ümumi orta təhsil bazasından isə 88-i fərqlənmə attestatına layiq görülüb, 196 məzun 500-dən yuxarı bal toplayıb. II ixtisas qrupunda isə ölkə üzrə ən yüksək nəticəni muxtar respublika məktəblisi toplayıb.
Təhsil naziri ümumtəhsil müəssisələrinin fəaliyyətindəki nöqsanlardan da danışaraq tədris prosesindən səmərəli istifadə edən, şagirdlərin bilik səviyyəsinin daim yüksəldilməsinə çalışan pedaqoji kollektivlərlə yanaşı, tədrisin keyfiyyətinə lazımi şəkildə nəzarət etməyən məktəblərin də olduğunu bildirib.
Vurğulayıb ki, təhsilin müasir yanaşmalar əsasında inkişaf etdirilməsi mühüm bir məsələ kimi muxtar respublika təhsil işçiləri qarşısında qoyulan vəzifələrdəndir. Təhsil naziri 2023-2024-cü tədris ilində təhsil müəssisələrinin binalarının qorunması, yaradılan şəraitdən səmərəli istifadə edilməsi, tədrisin yüksək səviyyədə aparılması, şagirdlərdə mütaliə mədəniyyətinin formalaşdırlması, tədris prosesində informasiya texnologiyalarından və laboratoriyaların imkanlarından səmərəli istifadə olunması, metodiki kabinetlərin fəaliyyətinin gücləndirilməsi ilə bağlı tapşırıqlar verib.
Məruzə ətrafında müzakirələr aparılıb, çıxışlar dinlənilib, konfransın qərarı qəbul edilib.
Konfransın sonunda muxtar respublikada təhsilin inkişafı ilə bağlı “Naxçıvan təhsili müstəqillik illərində” filminə baxış olub.
Bölmənin digər xəbərləri
