Naxçıvan Muxtar Respublikasının ümumitəhsil məktəbləri üzrə 3992 şagird məzun olub VİDEO
Naxçıvan, 14 iyun, AZƏRTAC
İyunun 14-də Naxçıvan Muxtar Respublikasının təhsil müəssisələrində “Son zəng” tədbirləri keçirilib. Naxçıvan Muxtar Respublikasının təhsil naziri Elxan Nəcəfov, Elm və təhsil nazirinin müavini Həsən Həsənli Heydər Əliyev adına tam orta məktəbdə keçirilən “Son zəng” tədbirlərində iştirak ediblər.
Naxçıvan Muxtar Respublikası Təhsil Nazirliyinin mətbuat xidmətindən AZƏRTAC-ın bölgə müxbirinə bildirilib ki, tədbirdə əvvəlcə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Heydər Əliyev adına tam orta məktəbin direktoru Məlahət Həsənova məktəbin nailiyyətləri haqqında məlumat verib.
Azərbaycan Elm və Təhsil nazirinin müavini Həsən Həsənli məzunları təbrik edərək bildirib ki, bu məktəb artıq 21 ildir fəaliyyət göstərir. 21 il öncə torpaqlarımız işğal altında idi. Beynəlxalq arenada bu faktla barışmağa, mübarizəmizi dayandırmağa, bunu qəbul etdirməyə çalışırdılar. Lakin bu gün ərazi bütövlüyümüz bərpa edilib, suverenliyimiz təmin olunub. Bu tarix hər birimiz üçün bir dərs, həyat nümunəsidir.
Qeyd olunub ki, bu gün Xocalıda, Xankəndidə, Şuşada, Cəbrayılda da məzunlar var. Onlar "Son zəng" tədbirlərini öz doğma yurd yerlərində qeyd edirlər.
Tədbirdə Naxçıvan Muxtar Respublikasının təhsil naziri Elxan Nəcəfov məzunları, müəllimləri və məzunların valideynlərini təbrik edərək bildirib ki, bu gün Naxçıvan Muxtar Respublikasında 3992 şagird məzun olur.
Təhsil naziri deyib ki, bugünkü məzunlar Böyük Zəfərin şagirdləri olaraq suverenliyi tam bərpa olunmuş ölkəmizdə gələcəyə doğru inamla addımlayacaq, Prezident İlham Əliyevin rəhbərliyi altında Vətənimiz adına əldə edilmiş bütün uğurlara sahiblənəcək, həmin uğurları gələcəyə daşıyacaqlar.
Elxan Nəcəfov tədbirdə şagird nailiyyətlərindən də danışaraq qeyd edib ki, bu il tam orta təhsil səviyyəsi üzrə 467 məzun 200-250, 302 məzun 250-300 intervalında bal toplayıb. 2 məzun isə 300 bal toplayaraq ölkə üzrə ən yüksək nəticəni göstərib.
Qeyd olunub ki, cari ildə həmçinin Naxçıvan Muxtar Respublikasında ümumi orta təhsil səviyyəsi üzrə keçirilmiş buraxılış imtahanlarının nəticələrində də ötən illə müqayisədə müsbət dinamika müşahidə olunub. Belə ki, 200–249 bal intervalında nəticə göstərən şagirdlərin sayı ötən ilə nisbətən 25, 250–300 bal intervalında 29, 200-300 bal aralığında nəticə göstərən şagirdlərin sayında isə 26 faiz artım olub.
Muxtar respublikada istedadlı şagirdlərin aşkara çıxarılması və onların elmi biliklərə yönləndirilməsi istiqamətində də ardıcıl və məqsədyönlü tədbirlər həyata keçirildiyini bildirən Nazir diqqətə çatdırıb ki, ölkə üzrə təşkil olunan Bebras, Cerebry, Bilbacar, Hakaton, Respublika Fənn müsabiqələrində, həmçinin Astronomiya, Lütfi Zadə, Hippo, Kenquru, Qərbi Azərbaycana Qayıdış, VII İngilis dili və Naxçıvan Muxtar Respublikası Təhsil Nazirliyi tərəfindən keçirilən Nəsrəddin Tusi adına fizika-riyaziyyat fənləri və Yusif Məmmədəliyev adına kimya və biologiya fənləri üzrə II Kimya-Biologiya Olimpiadalarında şagirdlərin iştirakı təmin olunub. Qeyd olunub ki, olimpiadalarda ümumilikdə 59 şagird qalib olub.
Tədbirdə valideynlər və şəhid anaları çıxış edərək məzunları təbrik edib, onlara uğurlar arzulayıblar.
Tədbirin bədii hissəsində Naxçıvan şəhər Körpələr evi-uşaq bağçalarının balaca fidanları, məktəbin birinci sinfini bitirən şagirdlər, məzunlar rəqs və musiqi nömrələri ilə çıxış ediblər.
Bölmənin digər xəbərləri
