Naxçıvanda ilin ilk yarısında 1717 körpə dünyaya gəlib
Naxçıvan, 27 avqust, AZƏRTAC
Cari ilin yanvar-iyun aylarında Naxçıvan Muxtar Respublikasında əhalinin sayında artım qeydə alınıb.
AZƏRTAC-ın bölgə müxbiri xəbər verir ki, ilin əvvəlindən əhalinin sayı 775 nəfər və ya 0,2 faiz artaraq, 1 iyul 2025-ci il tarixinə 471 min 718 nəfərə çatıb. Bu, ötən ilin eyni dövrü ilə müqayisədə 0,4 faiz çoxdur.
Əhalinin 35,5 faizini şəhər, 64,5 faizini isə kənd sakinləri təşkil edir. Cins bölgüsündə kişilər 49,9 faiz, qadınlar isə 50,1 faizdir. Hər kvadrat kilometrə 86 nəfər düşür.
Bu ilin ilk yarısında 1717 körpə dünyaya gəlib. Ancaq doğum səviyyəsi bir qədər zəifləyib. Əhalinin hər 1000 nəfərinə düşən göstərici 7,6-dan 7,3-ə enib. Doğulanların 52,2 faizi oğlan, 47,8 faizi qız uşaqları olub. 33 əkiz, 1 üçəm doğulub.
Eyni zamanda, 1106 ölüm qeydə alınıb və bu göstərici ötən ilin müvafiq dövrü ilə müqayisədə 4,6-dan 4,7-yə yüksəlib.
Bölmənin digər xəbərləri
