NOVOSİBİRSKDƏ AZƏRBAYCAN MƏDƏNİYYƏTİ GÜNLƏRİ KEÇİRİLƏCƏK

26.07.2003 [13:29]
Çap et
A⁺ A^-

Rusiyanın Novosibirsk vilayətindəki Azərbaycan diasporunun üzvləri AZƏRTAC-ın müxbirinə bildirmişlər ki, iyulun 27-də Novosibirskin “Sentralnı” mədəniyyət və istirahət parkında Sibirdə Azərbaycan mədəniyyəti günlərinə həsr olunmuş bayram proqramı təşkil ediləcəkdir.

Azərbaycan diasporu tərəfindən təşkil olunan tədbirdən məqsəd şəhərin sakinlərini ölkəmizin tarixi və mədəniyyəti, xalqımızın adət-ənənələri ilə daha yaxından tanış etməkdir. Həmin gün “Ruzi” və “Qarabağ” kollektivlərinin ifasında xalq mahnıları səslənəcək, tələbələrin şən və hazırcavablar klublarının komandaları çıxış edəcək, rəqs və şer müsabiqələri keçiriləcəkdir.

Parkın səhnəsində vilayətin digər icmalarının nümayəndələri də çıxış edəcəklər. Məsələn, bayramın qonaqlarını “Sabantuy” tatar xalq ansamblı da salamlayacaqdır.

Mahnı, rəqs və müsabiqələrlə zəngin belə rəngarəng proqram avqustun 3-də “Beryozovaya roşşa” mədəniyyət və istirahət parkında da keçiriləcəkdir.