SİYASƏT
Novruz bayramı münasibətilə Sankt-Peterburqda təntənəli tədbir keçirilmişdir
Bakı, 21 mart (AZƏRTAC). Novruz bayramı münasibətilə Sankt -Peterburq şəhərindəki “Buz sarayında” təntənəli tədbir keçirilmişdir. Heydər Əliyev Fondunun Rusiya Nümayəndəliyi və Azərbaycanın Sankt-Peterburqdakı baş konsulluğunun birgə təşkil etdiyi tədbiri giriş sözü ilə açan şəhər administrasiyanın xarici əlaqələr şöbəsinin müdiri Aleksandr Proxorenko xalqımızı bayram münasibətilə təbrik etmiş, ölkələrimiz arasındakı dostluq münasibətlərindən danışmışdır.
Heydər Əliyev Fondunun Rusiya Nümayəndəliyi adından çıxış edən Natiq Əliyev Fondun vitse-prezidenti Leyla xanım Əliyevanın təbriklərini çatdırmış, qarşıda duran əsas məqsədlərdən söz açmışdır. Sankt-Peterburqun “Smolni” universitetinin rektoru Heydər İmanov, Azərbaycanlı Qadınlar Assosiasiyasının Sankt-Peterburq bölməsinin rəhbəri Sahibə Rzayeva, Ümumrusiya Azərbaycanlıları Konqresinin vitse prezidenti İlqar Hacıyev çıxışlarında Novruzun tarixindən və xalqımızın bu bayrama olan sevgisindən bəhs etmişlər.
Baş konsul Qüdsi Osmanov xalqımızı təbrik edərək gənclərin bu kimi tədbirlərdə fəal iştirakının vacibliyini vurğulamışdır.
Sonra “Azərbaycanım” adlı sənədli film nümayiş olunmuşdur. Filmdə ulu öndər Heydər Əliyevin dövlət quruculuğu və müstəqilliyimizin möhkəmlənməsindəki müstəsna rolundan bəhs olunur.
Daha sonra Azərbaycandan gəlmiş müğənnilər maraqlı konsert proqramı ilə çıxış etmişlər.