NOVRUZ BAYRAMI XARİCİ ÖLKƏLƏRDƏ DƏ QEYD EDİLMİŞDİR
Martın 22-də Strasburqda Novruz bayramı münasibəti ilə bayram şənliyi keçirilmişdir.
Xarici Ölkələrdə Yaşayan Azərbaycanlılarla İş üzrə Dövlət Komitəsinin Avropa Ölkələri İdarəsinin rəisi Nazim Qaraxanov AZƏRTAC-ın müxbirinə demişdir ki, tədbirdə 200 nəfərdən çox adam, o cümlədən Avropa Şurasının, Strasburq bələdiyyəsinin və Azərbaycan İcmasının üzvləri iştirak etmişlər. Bayram süfrəsinə milli nemətlərimiz- paxlava, şəkərbura və digər sirniyyatlar, həmçinin Novruzun rəmzi olan səmənilər düzülmüşdü. Fransada yaşayan azərbaycanlılardan ibarət musiqi kollektivi maraqlı proqramla çıxış etmişdir.
Tədbir həm də xeyriyyəçilik məqsədi daşımışdır. Burada toplanan ianələr Bakıdakı kimsəsiz uşaqlara göndəriləcəkdir.
Novruz bayramı tədbirləri Latviya və Litvada da qeyd edilmiş, martın 23-də isə Estoniyada keçiriləcəkdir. Bundan başqa Qazaxıstan, Özbəkistan, Qırğızıstan, Ukrayna, Rusiya, Moldova, Almaniya, Rumıniya, Norveç və Belçikada da bayram şənlikləri təşkil olunmuşdur.
Bu tədbirlərin bir məqsədi də 31 mart azərbaycanlıların soyqrımı gününün qeyd edilməsinə hazırlıq haqqında müzakirələr aparmaqdır.
Bölmənin digər xəbərləri
