Numan Kurtulmuş: Üçtərəfli əməkdaşlığın yenidən canlandırılması mühüm əhəmiyyət kəsb edir
Tbilisi, 17 iyun, AZƏRTAC
Türkiyə, Gürcüstan və Azərbaycan arasında əməkdaşlığın üçtərəfli formatda yenidən canlandırılması mühüm əhəmiyyət kəsb edir. Düşünürəm ki, bu əməkdaşlıq bərpa olunmalıdır.
AZƏRTAC xəbər verir ki, bu barədə Türkiyə parlamentinin sədri Numan Kurtulmuş gürcü həmkarı Şalva Papuaşvili ilə birgə keçirdiyi mətbuat konfransında deyib.
O bildirib: “Gürcüstan, Türkiyə və Azərbaycan arasında əməkdaşlığın üçtərəfli mexanizmini bərpa etmək istəyirik. Ümid edirik ki, bu il belə formatda görüş baş tutacaq. Gələcəkdə regionun digər ölkələrinin də bu əməkdaşlığa qoşulması mümkündür”.
Numan Kurtulmuş qeyd edib ki, Gürcüstan və Türkiyə arasında münasibətlər bütün sahələrdə inkişaf edir və bu əlaqələrin dərinləşməsində parlament diplomatiyası mühüm rol oynayır. O, həmçinin parlamentlərarası dostluq qruplarını işlərini daha da aktivləşdirməyə çağırıb.
Türkiyə parlament sədri, eyni zamanda, Gürcüstan Prezidentinin iyul ayında Türkiyəyə rəsmi səfər edəcəyinə ümidvar olduğunu bildirərək deyib: “Bu səfər ölkələrimiz arasındakı münasibətlərin daha da dərinləşməsinə xidmət edəcək”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
