“Olimpiya hərəkatı” proqramının final mərhələsi Bakı İdman Sarayında keçiriləcək
Bakı, 12 aprel, AZƏRTAC
“Olimpiya hərəkatı” kütləvi idman proqramının final mərhələsinin açılışı aprelin 25-də saat 10:00-da Bakı İdman Sarayında olacaq. Bu arena ilk Avropa Oyunları keçirildiyi dövrdə badminton və stolüstü tennis yarışlarına ev sahibliyi edib. Olimpiya Oyunlarının qaydalarına uyğun olaraq, təşkil ediləcək proqramın açılışında 144 məktəbdən olan komandaların paradı, məktəblilərin keçdiyi yola nəzər salınan videoçarxın və hakimlər kollegiyasının təqdimatı olacaq. Proqramda əməyi olan insanlar üçün xüsusi mükafatlandırma mərasimi, habelə şou proqram təşkil ediləcək.
Bu fikirləri Milli Olimpiya Komitəsinin (MOK) marketinq departamentinin rəhbəri, proqramın əlaqələndiricisi Mehman Kərimov AZƏRTAC-a müsahibəsində deyib.
O bildirib ki, “Olimpiya hərəkatı” proqramının final mərhələsinin basketbol 3x3 və badminton üzrə yarışları aprelin 25-də və 28-də Bakı İdman Sarayında keçiriləcək. Yüngül atletika və veloidman yarışlarının finalı isə aprelin 26-da və 27-də sarayın ətrafında xüsusi dizayn olunmuş ərazidə təşkil ediləcək.
MOK-un marketinq departamentinin rəhbəri deyib ki, proqramda Olimpiya Oyunlarına məxsus maraqlı məqamların yer aldığı möhtəşəm açılış mərasimi təşkil olunacaq. Açılış mərasimindən sonra basketbol 3x3 və badminton idman növləri üzrə final yarışları başlayacaq. Açılış və bağlanış mərasimləri üçün Azərbaycanın tanınmış müğənnilərinin iştirak edəcəyi xüsusi musiqili-bədii proqram hazırlanıb. Bu proqramda idman elementlərindən ibarət şou təşkil olunacaq. Bədii proqramdan başqa azarkeşlər üçün fasilələrdə əyləncəli idman növləri üzrə yarışlar olacaq. Bu yarışlarda azarkeşlər səhnədə müxtəlif idman növlərində bacarıqlarını nümayiş etdirməklə hədiyə qazana biləcəklər.
Aprelin 26-27-də yüngül atletika və veloidman üzrə bütün mərhələ yarışları yekunlaşacaq və qaliblər müəyyənləşəcək.
Yarışların bağlanış mərasimi isə aprelin 28-də saat 15:00-da başlayacaq. Bağlanış mərasimindən əvvəl basketbol 3x3 və badminton idman növlərinin final yarışları olacaq və bu növlər üzrə komandaların Bakı birinciliyinin qalibləri məlum olacaq. Eyni zamanda, ən fəal məktəb, ən fəal azarkeş, ən fəal valideyn qrupu mükafatlandırılacaq.
Bağlanış mərasiminin sonunda isə həm musiqili-bədii proqram, həm də idman hərəkətləri ilə zəngin şou proqram təşkil olunacaq. Şou proqram hissəsində “Olimpiya hərəkatı”na böyük töhfələr verən Milli Olimpiya səfiri, Əməkdar Artist Tünzalə Ağayeva və onun “Səs Azərbaycan” komandası konsert proqramı ilə çıxış edəcək.
“Məqsədimiz final yarışlarını yalnız qapalı ərazidə deyil, eyni zamanda, açıq havada da keçirməkdir. Yarışlar başlamazdan əvvəl və sonra paytaxt sakinləri, xüsusilə uşaqlar, gənclər və şəhərimizin qonaqları üçün müxtəlif idman növlərində özlərini sınamaları üçün Bakı İdman Sarayının ətrafında müxtəlif ərazilər ayrılacaq. Çalışırıq ki, gəncləri idman növlərinə daha da həvəsləndirək. İstərdik ki, onlar olimpiya və idman bayramı coşqusunu bizlərlə birlikdə yaşasınlar. Biz də idman həyəcanını daha geniş kütləyə çatdıraq”, - deyə M.Kərimov vurğulayıb.
Bölmənin digər xəbərləri
