Ağsu, 4 aprel, AZƏRTAC

Ağsu rayon ictimaiyyəti Azərbaycan Respublikası Prezidenti yanında Təhlükəsizlik Şurasının aprelin 2-də keçirilən iclasında Ali Baş Komandan İlham Əliyevin konkret mövqeyini ürəkdən alqışlayır, dövlətimizin başçısının hər bir əmrinə səfərbər olduqlarını bildirirlər.

AZƏRTAC xəbər verir ki, aprelin 4-də Ağsu şəhər mədəniyyət sarayında keçirilən yığıncaqda çıxış edən rayon rəhbərliyi, Qarabağ müharibəsi veteranları, ağsaqqallar və gənclər aprelin 2-nə keçən gecə erməni qoşunlarının təxribatını və Azərbaycan ordusunun düşmənə sarsıdıcı zərbəsini bir daha diqqətə çatdıraraq, Prezident İlham Əliyevin Təhlükəsizlik Şurasındakı çıxışının erməni separatçılarına ciddi xəbərdarlıq olduğunu söyləyiblər. Vurğulanıb ki, cavab zərbəsində erməni silahlı qüvvələri xeyli canlı qüvvə və texnika itirib, bir sıra strateji yüksəkliklər azad olunub.

Qarabağ Əlilləri və Veteranları Şurası rayon şöbəsinin sədri Allahverdi Qəmbərov Prezidentin çıxışından aşağıdakı fikri sitat gətirib: “Biz sadəcə olaraq təxribata cavab vermişik. Düz də etmişik. Bizə qarşı yenə təxribat törədilsə, onlar yenə də öz cəzalarını alacaqlar. Bu bir. İkincisi, biz öz torpaqlarımızda vuruşuruq. Əgər erməni əsgəri ölmək istəmirsə, Azərbaycan torpağından rədd olsun”. A.Qəmbərov dövlətimizin başçısının bu bəyanatının hər bir Azərbaycan vətəndaşının qəlbindən gəldiyini söyləyib.

Çıxışlarda hər bir ağsulunun Prezidentin əmrlərinə səfərbər olduğu bildirilib.

Prezident, Ali Baş Komandan İlham Əliyevə qəbul olunan müraciətdə də bu fikir dönə-dönə vurğulanıb.

X X X

İsmayıllı rayon ictimaiyyəti nümayəndələrinin aprelin 4-də keçirilən yığıncağında Azərbaycan Respublikasının Prezidenti İlham Əliyevin aprelin 2-də Təhlükəsizlik Şurasının iclasındakı çıxışına və cəbhə bölgəsində baş verən hadisələrlə əlaqədar bəyanatına dəstək nümayiş etdirilib.

AZƏRTAC xəbər verir ki, tədbiri açan rayon icra hakimiyyətinin başçısı Mirdaməd Sadıqov 25 ildən çoxdur torpaqlarımızı işğal altında saxlayan tarixi düşmənlərimizin nəticə çıxarmaq əvəzinə, atəşkəsi pozmağa, yeni ərazilər zəbt etməyə cəhd göstərdiklərini qeyd edib. Cəbhə bölgəsində baş verən son hadisələrin ermənilər tərəfindən törədilən böyük təxribat olduğunu, Azərbaycan ordusunun bu təxribata layiqli cavab verdiyini diqqətə çatdırıb. Bir çox yaşayış məntəqələrimizi təhlükə altında saxlayan yüksəkliklər, müşahidə məntəqələri düşməndən geri alınıb, işğalçının qurduğu hərbi istehkamlar dağıdılıb, həmin yerlərdə öz ordumuz möhkəmlənib. Natiq qeyd edib ki, Prezident İlham Əliyevin Təhlükəsizlik Şurasının aprelin 2-də keçirilən iclasındakı çıxışı erməni separatçılarına layiqli cavab olmaqla, bir daha hər birimizi səfərbər olmağa, vətənimizin azadlığı üçün yüksək məsuliyyətə çağırır.

Diqqətə çatdırılıb ki, ordumuz düşməni böyük itkilərə məruz qoyub. Azərbaycan tərəfi atəşi birtərəfli dayandırsa da, işğalçı tərəf yenə də riyakar, təcavüzkar siyasətini silahla həyata keçirməyə çalışır.

Toplantıda Səfərbərlik və Hərbi Xidmətə Çağırış üzrə Dövlət Xidməti İsmayıllı rayon şöbəsinin rəisi Xamis Bədəlov, I qrup Qarabağ müharibəsi əlili Əlisahab Əzizov, şəhid ailəsi Ədibə Əliyarova, ağsaqqal ziyalı, Əməkdar müəllim Şəfaqət Rəsulov, Qarabağ müharibəsi əlili, əsgər atası Ravid Pənahov, rayon icra hakimiyyətinin işçisi Göyçək Rəhimova çıxış edərək, hər an Vətən uğrunda vuruşmağa hazır olduqlarını söyləyiblər. Çıxışlarda vurğulanıb ki, Prezident İlham Əliyevin Təhlükəsizlik Şurasının iclasındakı çıxışından irəli gələn vətənpərvərlik, döyüşmək, səfərbərlik ruhu hər bir azərbaycanlını Ali Baş Komandanın ətrafında daha sıx birləşməyə çağırır.

Prezident İlham Əliyevin ünvanına toplantı iştirakçıları adından müraciət qəbul olunub.

X X X

Kürdəmir şəhərindəki Heydər Əliyev Mərkəzində rayon ictimaiyyətinin iştirakı ilə yığıncaq keçirilib. Yığıncaqda Azərbaycan Respublikasının Prezidenti yanında Təhlükəsizlik Şurasının aprelin 2-də keçirilən iclasında dövlətimizin başçısının çıxışının kürdəmirlilərdə ruh yüksəkliyi yaratdığı bildirilib.

AZƏRTAC xəbər verir ki, tədbir iştirakçıları aprelin 1-dən 2-nə keçən gecə cəbhə bölgəsində Ermənistan silahlı birləşmələrinin təxribatının qarşısını alarkən həlak olan, ərazi bütövlüyümüz uğrunda canlarından keçən bütün şəhidlərimizin əziz xatirəsini bir dəqiqəlik sükutla yad ediblər.

Yığıncağı açan Kürdəmir Rayon İcra Hakimiyyətinin başçısı Ceyhun Cəfərov bildirib ki, Azərbaycan Respublikasının xarici siyasət strategiyasında Dağlıq Qarabağ münaqişəsinin beynəlxalq hüquq normalarına əsasən, yəni ölkəmizin ərazi bütövlüyü çərçivəsində həll edilməsi prioritet istiqamətdir. Buna görə də Azərbaycan dövləti diplomatik müstəvidə özünün bütün resurslarından maksimum istifadə etməklə münaqişənin həllinə nail olmağa çalışır. Buna baxmayaraq, Ermənistan davamlı surətdə müxtəlif xarakterli manevrlərlə danışıqlar prosesini uzatmağa və ya pozmağa cəhd göstərir. Hamıya məlum olduğu kimi, Ermənistanın Azərbaycan torpaqlarının 20 faizini işğal etməsi nəticəsində yaranan Dağlıq Qarabağ münaqişəsi ölkəmizin ərazi bütövlüyünə qarşı törədilən qəsdin və təcavüzkar siyasətin əyani nümunəsi olmaqla yanaşı, həm də regional və qlobal təhlükəsizlik üçün ciddi təhlükə yaradır. Azərbaycan tərəfi Dağlıq Qarabağ münaqişəsinin beynəlxalq hüquq normaları əsasında həlli istiqamətində fəallıq göstərsə də, Ermənistan qeyri-konstruktiv mövqe və təxribatçı hərəkətlər nümayiş etdirməklə danışıqlar prosesini pozmağa çalışır. Ümumiyyətlə, Ermənistan ordusunun qoşunların təmas xəttinin müxtəlif istiqamətlərində təxribatçı hərəkətlərini davam etdirməsi bu ölkənin mövqeyini açıq şəkildə əks etdirir. Azərbaycan Respublikasının Prezidenti yanında Təhlükəsizlık Şurasının son iclasında Prezident İlham Əliyev Ermənistanın bu təxribatçı hərəkətlərini təhlil edərək deyib: “Bugünkü təxribat da Ermənistanın Azərbaycana qarşı məkrli siyasətinin təzahürüdür. Bu gün erməni təxribatı Azərbaycan Ordusu tərəfindən layiqincə cavablandırıldı. Düşmənə çox böyük zərbələr endirildi. Düşmən böyük itkilər verdi. Düşmənə sarsıdıcı zərbə vuruldu. Bununla bərabər, bizim qəhrəman döyüşçülərimiz nəinki təxribatın qarşısını ala bildilər. Eyni zamanda, daha əlverişli hərbi mövqelərə malik oldular. Bu gün təmas xəttində Azərbaycanın üstünlüyü daha da möhkəmləndi. Aparılan hərbi əməliyyat nəticəsində, - onu da qeyd etmək istəyirəm ki, bu əməliyyat təxribata cavab olaraq aparılmışdır, - biz böyük hərbi qələbəni qazandıq. Bu münasibətlə Ordumuzu, bütün Azərbaycan xalqını təbrik etmək istəyirəm”.

Təhlükəsizlik Şurasının iclasında dövlətimizin başçısı münaqişənin həlli istiqamətində bütün dünya ictimaiyyətinə öz prinsipial mövqeyini bir daha bəyan edərək bildirib: “Mən bir daha demək istəyirəm ki, Azərbaycanın prinsipial mövqeyi var. Bizim ərazi bütövlüyümüz danışıqlar mövzusu deyil, olmayıb və heç vaxt olmayacaqdır. Bu münaqişə ölkəmizin ərazi bütövlüyü çərçivəsində öz həllini tapmalıdır. Bunun başqa yolu yoxdur...”

Yığıncaqdakı çıxışlarda Silahlı Qüvvələrimizin aprelin 2-də təmas xəttində Ermənistan Ordusu üzərindəki böyük hərbi qələbəsindən rayon ictimaiyyətinin iftixar hissi keçirdiyi, torpaqlarımızın mənfur düşmən tapdağından azad edilməsi istiqamətində apardığı qətiyyətli, prinsipial fəaliyyətində kürdəmirlilərin ölkə başçısının ətrafında sıx birləşdikləri vurğulanıb.

Erməni təxribatının qarşısının Silahlı Qüvvələrimiz tərəfindən qətiyyətlə alındığı, əks həmlə ilə onlara layiqli cavab verildiyi, Ali Baş Komandanın rəhbərliyi ilə qısa müddətdə torpaqlarımızın işğaldan azad ediləcəyi və bütün məcburi köçkünlərin öz ata-baba torpaqlarına qayıdacaqları əminliklə söylənilib. Qeyd olunub ki, kürdəmirlilər Ali Baş Komandanın əmrini səbirsizliklə gözləyirlər.

Sonda iştirakçılar adından Azərbaycan Respublikasının Prezidenti İlham Əliyevə müraciət qəbul olunub.